Qazaqstan AEHA minberinde atom salasyn damytýdaǵy ustanymyn aıtty

Qazaqstan delegatsııasynyń basshysy, Atom energııasy jónindegi agenttik tóraǵasynyń orynbasary Ǵumar Serǵazın atom energetıkasy men ónerkásibin, ıadrolyq ǵylym men medıtsınany damytý, sondaı-aq halyqaralyq yntymaqtastyqty nyǵaıtý máselelerine toqtaldy.

Ulttyq málimdemede Semeı ıadrolyq synaq polıgonynyń jabylǵanyna 35 jyl tolýyna erekshe nazar aýdaryldy. Qazaqstan ıadrolyq qarýsyzdaný jáne ıadrolyq qarýdy taratpaý jónindegi mindettemelerine beıildi ekenin rastap, ıAdrolyq synaqtarǵa jappaı tyıym salý týraly sharttyń múmkindiginshe tezirek kúshine enýine shaqyrdy.

Ǵumar Serǵazın Qazaqstannyń atom salasy damýynyń jańa kezeńi týraly da aıtty. 2026 jyly Memleket basshysy 2050 jylǵa deıingi atom salasyn damytý strategııasyn bekitti. Qujat energetıka, ónerkásip, ǵylym, bilim berý jáne joǵary tehnologııalyq óndiristi biriktiretin ulttyq ıadrolyq klaster qalyptastyrýdy kózdeıdi.

Sonymen qatar Qazaqstannyń jahandyq atom salasy men ıadrolyq otynnyń halyqaralyq jetkizý tizbegindegi róline nazar aýdaryldy. El aýmaǵynda ornalasqan AEHA-nyń Tómen baıytylǵan ýran bankiniń qyzmeti de atap ótildi.

– Beıbitshilikke, ǵylymǵa jáne adamzat ıgiligine qyzmet etetin atom qorqynyshtyń emes, energııanyń, progress pen úmittiń kózine aınala alady, – dedi Ǵumar Serǵazın.

AEHA-men yntymaqtastyqty odan ári keńeıtý de Qazaqstan úshin basym baǵyttardyń biri retinde ataldy. 2026 jyly qol qoıylǵan 2036 jylǵa deıingi yntymaqtastyqty keńeıtý jónindegi Jol kartasy atom energetıkasy, ıadrolyq medıtsına, ǵylym, qaýipsizdik jáne kadrlar daıarlaý salalaryn qamtıdy.

Qazaqstan AEHA-men strategııalyq áriptestikti jalǵastyrýǵa, sondaı-aq energetıka, ǵylym, medıtsına jáne ornyqty damý múddesi úshin atom energııasyn beıbit maqsatta paıdalanýdy odan ári damytýǵa daıyn ekenin rastady.

Aıta keteıik, Qazaqstan men «Rosatom» alǵashqy AES jobasy boıynsha kelisim jasady.