Qazaqstan advokattaryna saqtandyrý jaýapkershiligi júktelmek

ASTANA. QazAqparat - 2020 jyldan bastap Qazaqstandaǵy advokattarǵa qyzmettiń sapasyna qaraı saqtandyrý jaýapkershiligi júkteletin bolady. Bul týraly QR Ádilet mınıstrligi Tirkeý qyzmeti jáne zań qyzmetin uıymdastyrý departamentiniń dırektory Baqtygúl Ataǵazıeva málim etti, dep habarlaıdy «QazAqparat» HAA tilshisi.

Departament dırektory «Advokattyq qyzmet jáne zań kómegi týraly» jańa zań jobasynda advokattarǵa júktelgen birqatar mindettemelerdi atap ótti.

«2020 jyldan bastap advokattar men zańgerlik keńes berýshiler úshin mindetti túrde kásibı turǵyda saqtandyrý jaýapkershiligi júıesi engiziledi. Demek, advokattarǵa júgingen azamattar sapasyz zańgerlik qyzmetti kórip jatsa mindetti túrde olardan saqtandyrý tólemin talap ete alady. Saqtandyrý jaýapkershiligi álemdik tájirıbede bar», - deıdi Baqtygúl Ataǵazıeva.

Sondaı-aq departament dırektory advokattardy tártiptik jaýapkershilikke tartý máselesi de qarastyrylǵanyn atap ótti. Onyń sózine sensek, aldaǵy ýaqytta aımaqtyq jáne respýblıkalyq advokattar alqasynyń quramyndaǵy alty advokat, ýákiletti organnyń úsh qyzmetkeri men otstavkadaǵy úsh sýdıanyń tartylýymen ekijaqty tártiptik komıssııa qurý josparlanyp otyr.

Baqtygúl Ataǵazıeva buǵan qosa jańa zań jobasyn qabyldaý arqyly advokattardyń qyzmetiniń sapasy arta túsetinine senim bildirdi Onyńaıtýynsha, advokattardyń biliktiligin arttyrý úshin olardy arnaıy oqytý kózdelgen. Eger bul oqytýdan olar bas tartsa advokat retinde jumysyn jalǵastyra almaıdy. Mundaı jaýapkershilik arttyrý sharasy da zań jobasynda qarastyrylyp otyr.