Qazaqstan Adamı kapıtaldy damytý ındeksinde 31-orynda - Dúnıejúzilik bank
ASTANA. QazAqparat - Qazaqstan Adamı kapıtaldy damytý ındeksinde 31-oryndy, sonyń ishinde bilim berý boıynsha 10-oryndy ıelendi. Bul týraly Ortalyq kommýnıkatsııalar qyzmetinde ótken baspasóz máslıhatynda Bilim berý tájirıbesi boıynsha Dúnıejúzilik bank basqarýshysy Garrı Patrınos málim etti, dep habarlaıdy QazAqparat.
«Birqatar memlekette óte tómen nátıjelerdi kórip otyrmyz. Búgingi tańda Sıngapýr adamı kapıtaldy damytý jáne bilim berý boıynsha eń jaqsy nátıjeler kórsetýde.Qazaqstan bilim berýde - 10-orynda. Árıne, bul Qazaqstan úshin óte jaqsy kórsetkish. Jalpy, Adamı kapıtaldy damytý ındeksine engen 157 memleket arasynan Qazaqstan 31-oryndy ıelendi. Biz Qazaqstan bilim berý salasyndaǵy túrli testterge qatysqan 2012-2017 jyl aralyǵynda ózgeris dınamıkasyn kórip otyrmyz. Eýropa men Ortalyq Azııanyń basqa memleketterimen salystyryp, jaqsy nátıjeni ańǵarýdamyz», - dedi G.Patrınos.
Al QR Bilim jáne ǵylym mınıstrliginiń baspasóz qyzmetinen málim etkendeı, vedomstvo Dúnıejúzilik bankpen birlesip, orta bilim berý júıesinde sapany joǵarylatý men teńdikke qol jetkizýdi qamtamasyz etýge baǵyttalǵan «Orta bilim berýdi modernızatsııalaý» jobasyn resmı túrde iske qosýda.
Garrı Patrınos seriktesterin bilim berýdegi áleýmettik jobanyń bastalýymen quttyqtap, onyń Qazaqstanda óz maqsatyna jetetinine senim bildirdi.
