Azamattarymyz álemniń qaı qıyrynda júrse de, Qazaqstan kómek qolyn sozýǵa daıyn — Toqaev
ASTANA. KAZINFORM – Azamattarymyz álemniń qaı qıyrynda júrse de, olarǵa óz memleketi — Qazaqstan Respýblıkasy qamqor bolyp, kómek qolyn sozýǵa daıyn. Bul týraly Memleket basshysy Qasym-Jomart Toqaevtyń qatysýymen barlyq deńgeıdegi máslıhat depýtattarynyń ІІІ respýblıkalyq forýmynda aıtty.
— Azamattarymyz álemniń qaı qıyrynda júrse de, olarǵa óz memleketi — Qazaqstan Respýblıkasy qamqor bolyp, kómek qolyn sozýǵa daıyn ekenin biledi. Buǵan jaqynda Taıaý Shyǵystaǵy qaqtyǵystyń ortasynda qalǵan týrısterimiz, qajylyq saparǵa attanǵan otandastarymyz, kásipkerlerimiz kóz jetkizdi. Jaǵdaı shyn máninde kúrdeli edi. Shıelenis bastalǵan sátte óńir elderi basshylaryna osynaý qıyn-qystaý kezde shynaıy qoldaýymdy bildirip, hat joldadym. Budan bólek, Qatar, Birikken Arab Ámirlikteri, Bahreın, Oman, Saýd Arabııasy basshylarymen telefon arqyly sóılestim. Sondaı-aq otandastarymyzdy jedel evakýatsııalaý tapsyryldy. El aýmaǵyndaǵy tirshilikti qamtamasyz etý nysandary men mańyzdy ınfraqurylymdardy qorǵaý, Qarýly kúshter men quqyq qorǵaý vedomstvolarynda jaýyngerlik kezekshilik uıymdastyrý jóninde mindet júktedim. Syrtqy ister mınıstrliginiń janynan arnaıy shtab quryldy. Onyń quramyna barlyq vedomstvonyń ókilderi endi. Bul jumysqa áýe tasymaldaýshy jáne týrıstik kompanııalar, erikti demeýshiler atsalysty. Shtab táýlik boıy jumys istep, azamattarymyzdy aımaqtan qaýipsiz joldarmen alyp shyǵýǵa bar kúshin saldy. Qaqtyǵysqa qatysýshy taraptar bir-biriniń áskerı jáne azamattyq nysandaryn, sonyń ishinde áýejaılardy ballıstıkalyq zymyrandarmen, ushqyshsyz ushý apparattarymen atqylady. Sonyń saldarynan kóptegen eldiń áýe keńistigi jabyldy, — dedi Qasym-Jomart Toqaev.
Prezıdent keı jaǵdaılarda otandastarymyzdy ózge elderdiń aýmaǵy arqyly alyp ótýge týra kelgenin aıtty. Olardy dıplomattarymyz ben konsýldyq qyzmetkerleri qarsy alyp, ushaqtarǵa jaıǵastyryp, elge shyǵaryp salǵanyn eske saldy.
— Iranda qalǵan azamattarymyz Ázerbaıjan, Armenııa jáne Túrikmenstan shekaralary arqyly evakýatsııalandy. Elshilikter udaıy baılanysta bolyp, tıisti kómek kórsetti. Osy kúrdeli jumystyń nátıjesinde 9 myńǵa jýyq otandasymyz oq pen ottyń ortasynan aman-esen elge oraldy. Bul jumys áli de jalǵasyp jatyr. Buǵan sheteldikter de nazar aýdardy. Beıbit kúnniń ózinde mundaı sharalardy uıymdastyrýǵa kóp kúsh-jiger jumsaý kerek. Al soǵys jaǵdaıynda tipti qıyndap, mán-mańyzy arta túsedi. Osynaý stress-synaqtan sátti ótý Qazaqstannyń halyqaralyq arenadaǵy abyroı-bedelin asqaqtatty desem, artyq aıtqandyq emes. Taıaý Shyǵys elderiniń basshylaryna «kedergisiz dáliz» uıymdastyrǵany úshin taǵy da rızashylyǵymdy bildiremin. Otandastarymyzdy evakýatsııalaýǵa kómek kórsetken barsha janǵa, memlekettik organdar men áýe kompanııalarynyń qyzmetkerlerine alǵys aıtamyn. Qandaı jaǵdaı bolsa da, Qazaqstan óz azamattaryn eshqashan taǵdyr tálkegine qaldyrmaıdy. Pandemııa kezinde de solaı bolǵan. Álemniń túkpir-túkpirinen arnaıy borttarmen myńdaǵan otandasymyzdy elge aldyrdyq. Shetelderde qıyn jaǵdaı týyndaǵanda da dál osylaı áreket ettik. Tehnogendik apat, sý tasqyny, órt jáne basqa da tótenshe jaǵdaılar kezinde memleket qıyndyqqa dýshar bolǵan azamattarǵa ýáde etkenimizdeı qolushyn berdi, — dedi Memleket basshysy.
Prezıdenttiń aıtýynsha, «Azamattarymyzdy qıyn jaǵdaıda qaldyrmaımyz» degen sóz bul — jaı ǵana uran nemese popýlızm emes, memlekettik saıasatymyzdyń buljymas qaǵıdaty. Sondyqtan osy ustanymnyń jańa Konstıtýtsııa jobasynda kórinis tabýy zańdylyq. Ata zańymyzda: «Qazaqstan Respýblıkasy óz azamattaryn el aýmaǵynan tys jerde zańǵa sáıkes qorǵaýǵa kepildik beredi» dep taıǵa tańba basqandaı anyq jazylǵan.
— Barsha otandasymyzǵa belgili aqıqat bar: kók pasport ıeleri árqashan jáne kez kelgen jerde memleket qorǵaýynda bolady. Pasportymyzdyń qýaty memleketimizdiń yqpalynan, halqymyzdyń jasampaz rýhynan, zamannyń ozyq ıdeıalaryn ıgere alatyn qabiletimizden kórinedi, — dedi ol.
Al adam kapıtalyn jahandyq baǵalaý boıynsha Qazaqstan 160-tan asa eldiń arasynda 42-orynǵa taban tiregeni aıtyldy.
