Qazaqstan ACEF 2026 forýmynda tómen kómirtekti energetıka saıasatyn usyndy
ASTANA. KAZINFORM — Manıla qalasynda energetıkalyq aýysý, ekonomıkany kómirteksizdendirý jáne zamanaýı energetıkalyq tehnologııalardy damytý máselelerine arnalǵan Asia Clean Energy Forum 2026 (ACEF 2026) halyqaralyq forýmy ótti. Forýmdy Asian Development Bank (ADB) uıymdastyrdy. Bul týraly Energetıka mınıstrligi málim etti.
Bıylǵy forýmnyń negizgi taqyryby «Beyond Transition: Building Secure, Resilient, Inclusive and Intelligent Energy Systems» tujyrymdamasy boldy. Onyń aıasynda halyqaralyq sarapshylar taza energetıkany damytý, energetıkalyq ınfraqurylymdy jańǵyrtý, energetıkalyq júıelerdiń ornyqtylyǵyn arttyrý jáne jahandyq energetıkalyq aýysý jaǵdaıynda jańa tehnologııalyq sheshimderdi engizý máselelerin talqylady.
— Forým barysynda jańartylatyn energııa kózderin odan ári damytý, olardy energetıkalyq júıelerge yqpaldastyrý tetikterin jetildirý, energııa jınaqtaý tehnologııalaryn damytý, jelilik ınfraqurylymdy jańǵyrtý, ónerkásipti kómirteksizdendirý, sondaı-aq tómen kómirtekti jáne balamaly energetıkalyq sheshimderdi engizý máselelerine erekshe nazar aýdaryldy, — delingen habarlamada.
Forým aıasynda Qazaqstan Respýblıkasy Energetıka mınıstrliginiń atynan «Power and Industry Transformation: Lessons from ADB’s Energy Transition Mechanism to Industrial Decarbonization» taqyrybyndaǵy sessııada Energetıka mınıstrligi Jańartylatyn energııa kózderi departamenti dırektorynyń orynbasary Baltýǵan Dáýletqyzy Tajmakına spıker retinde sóz sóıledi.
Óz baıandamasynda ol Qazaqstanda klımattyq maqsattar, ekonomıkalyq ornyqtylyq jáne eldiń uzaq merzimdi energetıkalyq qaýipsizdigi arasyndaǵy teńgerimdi saqtaýǵa negizdelgen kezeń-kezeńimen energetıkalyq aýysýdy qamtamasyz etý baǵytynda júzege asyrylyp jatqan tásilderdi tanystyrdy.
Sondaı-aq jańartylatyn jáne balamaly energetıka salasyndaǵy normatıvtik-quqyqtyq bazany jetildirý, energetıka sektorynda tómen kómirtekti tehnologııalardy keńinen engizýge qolaıly jaǵdaı jasaý jónindegi jumystarǵa erekshe toqtaldy.
Baıandama barysynda jańartylatyn energııa kózderi sektoryn damytý energetıkalyq ınfraqurylymdy keshendi jańǵyrtýdy talap etetini atap ótildi. Bul baǵytta manevrlik generatsııany damytý, energııa jınaqtaý júıelerin engizý jáne turaqty energetıkalyq júıeni qalyptastyrýdyń mańyzdy quramdas bóligi retinde jylýmen jabdyqtaý sektoryna jańa tehnologııalyq sheshimderdi engizý qajettigi aıtyldy.
Sonymen qatar Qazaqstannyń jylý energetıkasy sektoryn jańǵyrtý baǵytyndaǵy jumystary, onyń ishinde energııa tıimdiligin arttyrýǵa, kómirtegi izin kezeń-kezeńimen azaıtýǵa jáne zamanaýı energetıkalyq tehnologııalardy engizýge baǵyttalǵan jylý ınfraqurylymyn damytýdy uzaq merzimdi josparlaýdyń jańa tetikteri tanystyryldy.
Asia Clean Energy Forum 2026 forýmyna qatysý Qazaqstannyń jańartylatyn jáne balamaly energetıkany damytý, sondaı-aq energetıka sektoryn uzaq merzimdi transformatsııalaý sheńberinde zamanaýı tómen kómirtekti tehnologııalardy engizý jónindegi dáıekti saıasatyn halyqaralyq sarapshylar qaýymdastyǵyna tanystyrýǵa kezekti múmkindik boldy.
Aıta keteıik, elektr energetıkasy salasyndaǵy 13 ınvestıtsııalyq joba maquldandy.
