Qazaqstan +997 kodynan bas tartty

Qazaqstan +7 telefon kodyn ózgerissiz qaldyrady. Tsıfrlyq damý mınıstrligi jańa kodqa kóshýge bolatynyn, biraq qarjylyq jáne tehnologııalyq problemalar týyndaıtynyn aıtýda, dep habarlaıdy Kazinform agenttigi. 

«Qazaqstan men Reseıdiń baılanys vedomstvolary arasynda jasalǵan «Dúnıejúzilik nómirleýdiń 7-aımaǵynyń nómirlenýin paıdalaný týraly» 2006 jylǵy 17 maýsymdaǵy kelisimge sáıkes, Qazaqstan qazirgi ýaqytta Reseı Federatsııasymen birlesip «+7» ıntegratsııalanǵan halyqaralyq kodyn paıdalanady. Jeke kodty alý maqsatynda 2021 jyly Qazaqstan +997 halyqaralyq telefon kodyn rezervke qoıdy. Baılanys operatorlarymen jańa kodqa kóshý máselesin pysyqtaýda jańa kodqa kóshýge bolatyny, biraq birqatar qarjylyq jáne tehnologııalyq problemalarǵa ákep soqtyratyny aıtyldy», - dep jazylǵan Tsıfrlyq damý mınıstrliginiń resmı jaýabynda.

Sonymen qatar, otandyq baılanys operatorlarynyń barlyq abonentterine memlekettik jáne banktik qyzmetterdi, áleýmettik jelilerdi jáne túrli qosymshalardy alý úshin barlyq servısterde óz derekterin jańartý qajettiligi týyndaıdy. Tıisinshe, ótpeli kezeńde sátsizdikter men jaǵymsyz tájirıbeler yqtımaldyǵy joǵary.

«Sondaı-aq, mınıstrlik halyqaralyq telekommýnıkatsııa odaǵymen qaıta kelissózder júrgizip, +7 halyqaralyq kodyn ózgertpeı qaldyrý týraly sheshim qabyldady. Osyǵan baılanysty Reseı Federatsııasynyń tsıfrlyq damý, baılanys jáne buqaralyq kommýnıkatsııalar mınıstrligimen Reseı Federatsııasynyń úkimeti men Qazaqstan úkimeti arasynda dúnıejúzilik nómirleýdiń 7-shi aımaǵynyń nómirin paıdalaný týraly jańa kelisim jasaý máselesi pysyqtaldy. Qazirgi ýaqytta joba memlekettik organdarmen jáne múddeli taraptarmen kelisilgen. Kelisý nátıjeleri boıynsha joba Reseı Federatsııasyndaǵy dıplomatııalyq arnalar arqyly jiberildi», - deıdi vedomstvo.

Qazirgi ýaqytta Reseı Federatsııasy jaǵynda memleketishilik qaıta kelisý rásimderi júrip jatyr. 

Ári qaraı jobany kelisý týraly Reseı Federatsııasynyń notasyn alǵan soń kelisimge qol qoıý jáne qabyldaý jumystary júrgiziledi.