Qazaqstan 99 halyqaralyq baǵyt boıynsha áýe qatynasyn ornatty

NUR-SULTAN. QazAqparat – Qazaqstan 26 memleketpen 99 halyqaralyq baǵyt boıynsha áýe qatynasyn ornatty. Bul týraly Úkimet otyrysynda «Nurly jol» baǵdarlamasynyń iske asý barysyn talqylaý kezinde QR Indýstrııa jáne ınfraqurylymdyq damý mınıstri Beıbit Atamqulov málim etti, dep habarlaıdy QazAqparat tilshisi.

«Azamattyq avıatsııa salasynda besjyldyq qorytyndysy boıynsha otandyq áýejaılarda qyzmet kórsetilgen jolaýshylar sany 16,2 mln adamǵa deıin ósti, 8,1 mln jolaýshy tasymaldandy, bul 2014 jylǵa qaraǵanda 47 paıyzǵa artyq. Jalpy, otandyq avıakompanııalardyń áýe kemeleri parkiniń ósýi men jańartylýy baıqalady. Áýe kemeleriniń memlekettik tizilimine 78 birlik engizildi, al negizgi tasymaldaýshylar parkin 22 ushaqqa tolyqtyrdy», - dedi mınıstr.

Onyń sózine qaraǵanda, qazaqstandyq áýejaılardyń jerústi ınfraqurylymyn damytý boıynsha jumys jalǵasýda, oǵan ınvestıtsııalardyń jalpy kólemi 128 mlrd. teńgeni qurady.

«Birinshi «Nurly jol» aıasynda Petropavl, Taraz jáne Semeı áýejaılaryndaǵy termınaldar qalpyna keltirildi. Almaty, Petropavl, Taraz, Oral jáne Semeı áýejaılarynyń ushý-qoný jolaqtaryn qaıta jańartý men jańǵyrtý jumystary júrgizildi. Aǵymdaǵy jyly Qostanaı jáne Balqash áýejaılarynyń ushý-qoný jolaqtaryn qaıta jańartý aıaqtalýda», - dedi Atamqulov.

Halyqaralyq avıaqatynastar sanyn arttyrý boıynsha jumystar júrgizilýde. Búgingi tańda Qazaqstan 26 memleketpen 99 halyqaralyq baǵyt boıynsha áýe qatynasyn ornatqan.

«2017 jyldan bastap Nur-Sultan qalasynda «ashyq aspan» rejımi engizildi. 3 jyl ishinde qazaqstandyq jáne sheteldik avıatasymaldaýshylar 19 jańa baǵyt ashty, onyń ishinde Tokıo, Varshava, Býdapesht, Helsınkı qalalary bar. Burynnan bar London, Máskeý, Pekın, Ystambul marshrýttarynda ushý jıiligi ulǵaıdy. Qazaqstandyq tasymaldaýshylar Shanhaı (2020 j), Sıngapýr (2020 j.), Nıý-Iork (2021 j.) sııaqty iri qalalarǵa reıster ashýdy josparlap otyr», - dedi vedomstvo basshysy.