Qazaqstan 874 mln tekshe metr sýdy qalaı únemdedi
ASTANA. KAZINFORM — Qazaqstanda aýyl sharýashylyǵynda sý únemdeý tehnologııalaryn engizý qarqyn aldy. 2025 jyldyń qorytyndysynda mundaı júıeler 543,5 myń gektar alqapty qamtyp, 874 mln tekshe metr sýdy únemdeýge múmkindik berdi. Bul týraly Sý resýrstary jáne ırrıgatsııa mınıstrligi málim etti.
Vedomstvonyń málimetinshe, sýdy únemdeýdiń negizgi rezervi aýyl sharýashylyǵynda shoǵyrlanǵan. Bul salaǵa jalpy sý tutynýdyń shamamen 60%-y tıesili. Zamanaýı sýarý júıelerine kóshýdi jedeldetý maqsatynda sý berý shyǵyndaryn sýbsıdııalaý jáne sý únemdeý tehnologııalaryna jumsalǵan shyǵyndardyń bir bóligin óteý jónindegi fýnktsııalar Sý resýrstary jáne ırrıgatsııa mınıstrliginiń quzyryna shoǵyrlandyryldy.
2024 jyly mundaı tehnologııalarmen qosymsha 153 myń gektar qamtylsa, 2025 jyly bul kórsetkish taǵy 154 myń gektarǵa artty. Ortasha jyldyq ósim burynǵy 30-35 myń gektar kórsetkishpen salystyrǵanda shamamen 150 myń gektarǵa jetti.
2025 jyldyń qorytyndysy boıynsha sý únemdeý tehnologııalary qoldanylatyn egistik jerlerdiń jalpy aýmaǵy 543,5 myń gektarǵa jetti, bul shamamen 874 mln tekshe metr sýdy únemdeýge múmkindik berdi. 2030 jylǵa qaraı bul kórsetkishti 1,3 mln gektarǵa deıin, al únemdeletin sý kólemin shamamen 2,2 mlrd tekshe metrge deıin jetkizý josparlanyp otyr.
2026-2028 jyldary sý únemdeý tehnologııalaryn qarjylandyrý 2023-2025 jyldardaǵy 55,5 mlrd teńgeden tórt ese kóp, ıaǵnı 228 mlrd teńgege deıin ulǵaıtylady.
— Fermerlerdiń shyǵyndaryn óteý 80%-ǵa deıin joǵarylatyldy. Bul zamanaýı sýarý júıelerin keńinen qoldanýǵa jáne sý shyǵynyn odan ári azaıtýǵa múmkindik beredi, — delingen habarlamada.
Sýdy zańsyz paıdalanýǵa qarsy kúres sheńberinde Bas prokýratýramen birlesken sýdyń «qara naryǵyn» joıý jónindegi jol kartasy júzege asyrylýda. Onda sý resýrstarynyń aýdıti, táýekel aımaqtaryn anyqtaý, sý sharýashylyǵy ınfraqurylymyna arnalǵan shyǵystardy tekserý jáne sybaılas jemqorlyqqa qarsy sharalar qarastyrylǵan.
Zańbuzýshylyqtar týraly «Sýdyń qara naryǵyna jol joq!» Telegram-boty arqyly jasyryn túrde habarlaýǵa bolady. 2025-2026 jyldary 1 myńnan astam tekserý júrgizilip, 316 mln teńgeden astam aıyppul salyndy. Ǵaryshtan jasalǵan monıtorıng nátıjesinde qosymsha 472 zańbuzýshylyq anyqtaldy, olar boıynsha da 206 mln teńgeden astam aıyppul salyndy.
Aıta keteıik, Qazaqstanda 42 jańa sý qoımasy salynyp, sý salasy túbegeıli jańǵyrmaq.
