Qazaqstan 83 taýar túri boıynsha ımportqa táýeldilikti azaıtty
ASTANA. KAZINFORM — Qazaqstanda óndirisi jolǵa qoıylǵan 183 taýardyń 83-i boıynsha ımport úlesi azaıdy.
Ásirese keramıkalyq taqtaısha, teledıdar, mys symy men asúı jıhazy boıynsha shetelden ákelinetin ónimniń úlesi aıtarlyqtaı tómendegen,
Ulttyq statıstıka bıýrosynyń málimetinshe, 2026 jyldyń qańtar-tamyz aılarynda atalǵan 83 taýar boıynsha ımport úlesi 2023 jyldyń sáıkes kezeńimen salystyrǵanda tómendegen. Al 51 taýar boıynsha kerisinshe ósken. Qalǵan 49 taýarda aıtarlyqtaı ózgeris bolmaǵan.
Máselen, keramıkalyq taqtaısha boıynsha ımport úlesi 78,7%-dan 48,6%-ǵa deıin azaıǵan. Teledıdar, mys symy men asúı jıhazy boıynsha da osyndaı ózgeris baıqalǵan.
EnergyProm sarapshylary ımport úlesiniń qalaı esepteletinin túsindirdi.
— Bul kórsetkishti eseptegende elde óndirilgen jáne shetelden ákelingen taýar kólemi, sondaı-aq Ulttyq statıstıka bıýrosynyń «Baǵalaý» kórsetkishi eskeriledi. Eksportqa shyǵarylǵan ónim jalpy kólemnen shegerilmeıdi. Sondyqtan bul derek el ishinde tutynylatyn taýarlardyń qansha paıyzy ımportqa tıesili ekenin kórsetpeıdi. 2023–2025 jyldardaǵy málimetter naqtylanǵan, al 2026 jylǵy derekter ázirge aldyn ala eseptelgen, — delingen jarııalanymda.
Keramıkalyq taqtaısha óndirisi ımport kóleminen asty
Sarapshylardyń aıtýynsha, ımporttyń ornyn otandyq ónimmen almastyrý ásirese keramıkalyq taqtaısha óndirisinde anyq baıqalady.
2026 jyldyń alǵashqy segiz aıynda Qazaqstanda 12 mln sharshy metr keramıkalyq taqtaısha shyǵarylǵan. Bul 2023 jylǵy 4,9 mln sharshy metrmen salystyrǵanda 2,4 ese kóp. Al byltyrǵy 10,1 mln sharshy metrden 19,2% artyq.
Osy kezeńde shetelden ákelinetin taqtaısha kólemi 18,1 mln sharshy metrden 11,3 mln sharshy metrge deıin qysqarǵan. Byltyrmen salystyrǵanda ımport 16% azaıǵan. 2025 jyly elge 13,5 mln sharshy metr taqtaısha jetkizilgen edi.
Import úlesi de jyl saıyn tómendegen. 2024 jyly bul kórsetkish 77%, 2025 jyly 57,3% bolsa, bıyl 48,6%-ǵa deıin azaıǵan.
Sarapshylardyń málimetinshe, bıyl alǵash ret Qazaqstanda óndirilgen keramıkalyq taqtaısha kólemi shetelden ákelingen ónim kóleminen asqan. Byltyr ımport kólemi otandyq óndiristen joǵary bolǵan.
Jıhaz ben qurylys materıaldary: ımport úlesi qalaı ózgerdi?
Jıhaz ben qurylys materıaldary boıynsha ımport úlesi birkelki ózgermegen.
Máselen, asúı jıhazy boıynsha ımport úlesi úsh jylda 33,9%-dan 23%-ǵa deıin tómendegen. Alaıda otandyq óndiris te qysqarǵan.
2023 jyldyń qańtar-tamyz aılarynda Qazaqstanda 96,6 myń dana asúı jıhazy shyǵarylsa, bıyl osy kezeńde 79,9 myń dana óndirilgen. Al shetelden ákelinetin jıhaz kólemi budan da kóbirek azaıyp, 49,6 myńnan 23,9 myń danaǵa deıin qysqarǵan.
Matras óndirisi úsh jylda 1,5 ese ósken. Bıylǵy alǵashqy segiz aıda elimizde 177,3 myń matras shyǵarylǵan. 2023 jyly bul kórsetkish 118,4 myń dana bolǵan. Degenmen byltyrǵy 193,5 myń danamen salystyrǵanda óndiris 8,4% azaıǵan. Osy taýar boıynsha ımport úlesi 45%-dan 37,9%-ǵa tómendegen.
Al kúıdirilgen sazdan jasalǵan kirpish, taqtaısha jáne basqa da buıymdar boıynsha ımport úlesi úsh jylda 30,1%-dan 34,5%-ǵa ósken. Shyny ydystarda da bul kórsetkish 42,9%-dan 46,7%-ǵa kóterilgen.
Degenmen sońǵy bir jylda kirpish pen osyǵan uqsas buıymdar boıynsha ımport úlesi 42,4%-dan 34,5%-ǵa deıin azaıǵan.
Mys symy boıynsha da ımport úlesi edáýir tómendegen. Úsh jylda bul kórsetkish 16,9%-dan 3,8%-ǵa deıin qysqarǵan. Shetelden ákelinetin mys symynyń kólemi 1,5 myń tonnadan 300 tonnaǵa azaıǵan. Al otandyq óndiris 7,5 myń tonnadan 8,7 myń tonnaǵa ósken.
Azyq-túlik ónimderi boıynsha ımport úlesi baıaý azaıǵan
Azyq-túlik ónerkásibinde ımport úlesi basqa taýarlarmen salystyrǵanda az ózgergen.
Máselen, shujyq ónimderi boıynsha ımport úlesi 2023 jyldyń qańtar-tamyz aılaryndaǵy 40%-dan bıyl 33%-ǵa deıin azaıǵan. Osy kezeńde otandyq óndiris 44,3 myń tonnadan 54 myń tonnaǵa ósken. Al shetelden ákelinetin shujyq kólemi 29,5 myń tonnadan 26,7 myń tonnaǵa qysqarǵan.
Іrimshik pen súzbe boıynsha ımport úlesi 43,3%-dan 40,8%-ǵa tómendegen. Qazaqstanda bul ónimderdiń óndirisi 29,7 myń tonnadan 40,3 myń tonnaǵa jetken. Alaıda ımport ta kóbeıgen. Úsh jyl buryn 22,7 myń tonna ónim ákelinse, bıyl bul kórsetkish 27,7 myń tonnaǵa jetken. 2024 jyly irimshik ımportynyń úlesi 48%-ǵa deıin kóterilgen edi.
Al shyryn men as tuzy boıynsha ımport úlesi aıtarlyqtaı ózgermegen. Shyryn ımportynyń úlesi 2023 jylǵy 36,2%-dan bıyl 35,9%-ǵa tómendegen. As tuzy boıynsha kerisinshe 6,1%-dan 6,6%-ǵa ósken. Soǵan qaramastan, elimizde tuz óndirisi 229,9 myń tonnadan 290,5 myń tonnaǵa deıin artqan.
Avtokólik pen turmystyq tehnıka óndirisi ósti
Qazaqstanda keıbir taýarlardyń óndirisi birneshe ese artqan. Buryn elimizde shyǵarylmaǵan ónimder de óndirile bastaǵan.
Ulttyq statıstıka bıýrosynyń málimetinshe, 2026 jyldyń qańtar-tamyz aılarynda elimizde 117,2 myń jeńil avtokólik shyǵarylǵan. Bul byltyrǵy 87,3 myń kólikpen salystyrǵanda 34,2%, al 2023 jylǵy 88,5 myń kólikten 32,4% kóp.
Osy ýaqytta avtokólik ımporty bir jylda 159 myńnan 116,2 myń danaǵa deıin qysqarǵan. Nátıjesinde ımport úlesi 49,8%-ǵa deıin tómendegen.
Buǵan deıin bul kórsetkish kerisinshe ósip kelgen. 2023 jyly ımport úlesi 53,2% bolsa, 2025 jyly 64,6%-ǵa jetken edi.
Teledıdar naryǵynda shetelden ákelinetin ónimniń úlesi áli de joǵary — 83,9%. Degenmen 2023 jyly bul kórsetkish 99,2% bolǵan.
Bir jylda Qazaqstandaǵy teledıdar óndirisi 2,7 ese ósip, 146,7 myń danaǵa jetken. Al ımport kólemi 2 mln danaǵa jýyq kórsetkishten 767,2 myń danaǵa deıin qysqarǵan.
Kir jýǵysh mashınalar óndirisi de jolǵa qoıylǵan. 2023 jyldyń qańtar-tamyz aılarynda Qazaqstanda turmystyq kir jýǵysh mashınalar shyǵarylmaǵan. Al 2025 jyldyń sáıkes kezeńinde 17,7 myń dana, bıyl 49,4 myń dana óndirilgen. Bıyl otandyq ónim osy taýardyń jalpy kóleminiń 10,6%-yn quraǵan.
Dápter, dárethana qaǵazy men qant ımporty artty
Keıbir taýarlar boıynsha ımportqa táýeldilik kerisinshe kúsheıgen. Sarapshylardyń málimetinshe, bul ásirese dápter men dárethana qaǵazy naryǵynda baıqalǵan.
2023 jyldyń qańtar-tamyz aılarynda dápter ımportynyń úlesi 66,7% bolsa, bıyl 90,3%-ǵa jetken. Al otandyq óndiris 4,2 ese qysqaryp, 1 myń tonnaǵa deıin azaıǵan.
Dárethana qaǵazy boıynsha ımport úlesi 41,9%-dan 61,5%-ǵa ósken. Úsh jylda shetelden ákelinetin ónim kólemi 15,1 myń tonnadan 28,2 myń tonnaǵa jetken. Al Qazaqstandaǵy óndiris 21 myń tonnadan 17,6 myń tonnaǵa tómendegen.
Qant boıynsha da ımport úlesi artqan. Úsh jyl buryn bul kórsetkish 61,2% bolsa, bıyl 77,7%-ǵa jetken.
Osy kezeńde otandyq qant óndirisi 133,8 myń tonnadan 81,4 myń tonnaǵa deıin qysqarǵan. Al ımport 210,7 myń tonnadan 284,2 myń tonnaǵa ósken.
Metall konstrýktsııalary boıynsha ımport úlesi 48,9%-dan 63,8%-ǵa kóterilgen. Shetelden ákelinetin ónim kólemi 2,4 ese ósip, 221,1 myń tonnaǵa jetken. Al otandyq óndiris 28,5% artqan.
Shokolad, sondaı-aq shokolad pen qanttan jasalǵan kondıterlik ónimder boıynsha da ımport úlesi kóbeıgen. Úsh jylda bul kórsetkish 52%-dan 61,1%-ǵa ósken. Osy kezeńde otandyq óndiris 9,7% qysqaryp, ımport 30,9% artqan.
Buǵan deıin Qazaqstanda ımportty almastyrý men ınvestıtsııanyń el ekonomıkasyna yqpaly týraly jazǵan edik.
