Qazaqstan 7 tamyzda Olımpıadada medaldar sanyn jetige jetkizdi
PARIJ. KAZINFORM – Frantsııa astanasy Parıj qalasynda ótip jatqan Olımpıada oıyndarynda 7 tamyzda Qazaqstan quramasy medaldar sanyn jetige jetkizdi.
Eń áýleli grek-rım kúresinen 77 kelige deıingi salmaqta Demeý Jadyraev Parıj Olımpıadasynyń fınalynda japonııalyq balýan Nao Kýsakaǵa ese jiberip, kúmis júldeger atandy. Al taǵy bir 87 keli salmaqta el namysyn qorǵaǵan balýanymyz Nursultan Tursynov shırek fınalda Rıo Olımpıadasynyń kúmis, Tokıo Olımpıadasynyń chempıony Jan Belenıýkten (Ýkraına) jeńilip qaldy.
7 tamyz kúngi Olımpıada oıyndarynyń sońǵy núktesin bokstan 80 kelige deıingi salmaqta Nurbek Oralbaı qoıdy. Ol Parıj Olımpıadasynyń fınalynda Aleksandr Hıjnıakqa (Ýkraına) ese jiberip, el qorjynyna úshinshi kúmis júldeni syılady. Shıelenisti ótken jekpe-jektiń esebi – 2:3.
Osylaısha, el qorjynyna bir kúnde eki kúmis medal túsip, jalpy medaldarymyz sany 7- ge jetti.
Ókinishke qaraı, ózge sport túrinen synǵa túsken sportshylarymyz jarqyn jetistikterimen qýanta alǵan joq.
Atap ótsek, velotrekten sprınt baǵdarlamasynyń irikteýinde synǵa túsken Andreı Chýgaı 30-orynǵa taban tirep, kelesi kezeńge shyǵa almady. Ýaqyt kórsetkishi – 10.047 sekýnd.
Taekvondoshymyz Samırhon Ababakırov (58 kg) alǵashqy aınalymda Tokıo Olımpıadasynyń jeńimpazy, álem chempıony Vıto Dell'akvılaǵa (Italııa) jol berdi. Esep – 1:2.
Baıdarka men kanoede esýden el namysyn qorǵaǵan Sergeı Emelıanov kanoede 1000 metrge jarystyń irikteýinde óz tobynda 4-oryn aldy.
Baıdarkada 1000 metrge eskek esýde jekeleı synnyń irikteýinde otandasymyz Bekarys Ramatýlla márege sońǵy bolyp jetip, jartylaı fınalǵa tikeleı joldama ala almady. Endi ol shırek fınalda taǵy júlde úshin baq synaıdy.
Osylaısha, Olımpıadanyń on ekinshi jarys kúninen keıin Qazaqstan quramasynyń qorjynynda 1 altyn, 3 kúmis, 3 qola júlde bar.
Esterińizge sala ketsek, Frantsııa astanasy Parıj qalasynda ótip jatqan XXXIII jazǵy Olımpıada oıyndary 11 tamyzda máresine jetedi. Oıyndarǵa álemniń 205 elinen 10 500 sportshy qatysyp jatyr.
Olımpıadashylar 32 sport túrinen 329 medal jıyntyǵyn sarapqa salyp jatyr.
