Qazaqstan 600 tonnadan astam ónimdi eksporttaýshy elderge keri qaıtardy
ASTANA. QazAqparat - Karantınge jatqyzylǵan 600 tonnadan astam ónim eksporttaýshy memleketterge keri qaıtaryldy, dep habarlaıdy QazAqparat QR Aýyl sharýashylyǵy mınıstrligine silteme jasap.
«6-20 qazan kúnderi Qazaqstan Respýblıkasynyń aýmaǵyna jetkizilgen joǵarǵy fıtosanıtarııalyq qaýpi bar karantınge jatqyzylatyn ónimderdi tekserý barysynda Qazaqstan Respýblıkasy jáne Eýrazııalyq ekonomıkalyq odaǵynyń ósimdikter karantıni salasyndaǵy zań buzýshylyqtyń 59 faktisi anyqtaldy», - delingen mekeme habarlamasynda.
Atap aıtqanda, Reseı Federatsııasynan mindetti fıtosanıtarlyq ilespe sertıfıkatynsyz ónim (jarma túrleri - 22 tonna, kartop - 83,5 tonna, banan - 20 tonna, kesilgen aǵash daıyndamalary - 74,5 tekshe metr) ákelý jaǵdaılary anyqtaldy.
Qyrǵyzstan Respýblıkasynan mindetti fıtosanıtarlyq ilespe sertıfıkatsyz ónim (alma jáne almurt 93,3 tonna, júzim 21 tonna, qyzylsha 4 tonna) ákelýdiń 11 jaǵdaıy tirkelgen. 17 jaǵdaıda (20,6 tonna qurma jáne anardan, 47,7 tonna alma jáne almurttan, 42,4 tonna keptirilgen jemisterden, 60,1 tonna júzimnen jáne 66,7 tonna kartoptan komstoq qurttary, Shyǵys jemiri, kartoptyń altyn tústes qurty, azııalyq jemis shybyny, kartop kúıesi tabylǵan.19 jaǵdaıda ónim (10,5 tonna tańqýraı jáne qulpynaı, 37,2 tonna alma jáne almurt, 61,2 tonna júzim, 12 tonna qara órik, 2,9 tonna anar) tańbalanbaı jetkizilgen.
Odan bólek, Qytaı Halyq Respýblıkasynan 0,02 tonna mandarın mindetti fıtosanıtarlyq sertıfıkatsyz ákelingen.
Joǵaryda kórsetilgen jalpy salmaǵy 605,12 tonna jáne 74,5 tekshe metr bolatyn karantınge jatqyzylatyn ónimder eksporttaýshy memleketterdiń aýmaǵyna qaıtaryldy.
