Qazaqstan 6 sáýirde Halyqaralyq sport kúnin atap ótedi
ASTANA. QazAqparat - 6 sáýir BUU Bas Assambleıasynyń 2013 jylǵy qararymen beıbitshilikti saqtaý jolynda Halyqaralyq sport kúni retinde bekitildi.
Qararǵa: Qazaqstan, Belarýs, Grýzııa, Makedonııa, Reseı, Rýmynııa jáne Serbııa demeýshilik jasady. Bastama kótergender Sport kúni 23 maýsymda toılanatyn Halyqaralyq Olımpıada kúnin tolyqtyra túsedi dep sendi.
Azııa boks konfederatsııasy osy mereke jaıly Halyqaralyq áýesqoı boks qaýymdastyǵynyń vıtse-prezıdenti, Azııa boks konfederatsııasynyń prezıdenti Serik Qonaqbaevpen suhbattasty.
«Bıyl álemdik sport qoǵamdastyǵy beıbitshilikke qyzmet etetin Halyqaralyq sport kúnin besinshi ret toılaǵaly otyr. Merekeniń aty da sporttyń álem elderi men halyqtaryn biriktirýdegi orasan rólin ańǵartady. Buǵan aıqyn dálel retinde Soltústik jáne Ońtústik Koreıa arasyndaǵy jaǵdaıdy keltirýge bolady. Eki memleket arasyndaǵy qatynastardyń jaqsarýy Phenchhandaǵy Olımpıada qarsańynda bastaldy, bul koreı túbegindegi shıelenisti retteýge baǵyttalǵan batyl qadam boldy. Óz basym eń bolmaǵanda Olımpıada oıyndary kezinde áskerı qaqtyǵystardyń toqtaǵanyn qalaımyn. Ony biz oılap tapqan joqpyz. Bul - Olımpıada oıyndarynyń fılosofııasy», - deıdi Serik Qonaqbaev.
Halyqaralyq sport kúni retinde 6 sáýirdiń tańdalýy kezdeısoq emes. Alǵashqy Olımpıada oıyndary 1986 jyly 6 sáýirde bastalyp, 15 sáýirge deıin jalǵasqan bolatyn.
«Osy meıramdy álemdegi kóptegen elder atap ótedi. Qazaqstan BUU-nyń osy qararyn eń alǵashq qoldaǵan elderdiń biri bolýy da tegin emes. Óıtkeni bizdiń elde sportqa erekshe mán beriledi. Memleket basshysy bizdiń sportshylardyń aldyńǵy qatardaǵy jankúıeri desek qatelespeımiz. BUU men HOK birge kótergen osy bastama jer betindegi halyqtardy barynsha sportqa jumyldyrýǵa qosymsha kúsh pen múmkindikter beredi», - dep oıyn túıindedi Serik Qonaqbaev.
