Qazaqstan 5G jelisin engizýde álem elderiniń ondyǵyna kiredi

NUR-SULTAN. QazAqparat – QR Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Abylaıhan Ospanov elimizde 5G jelisin engizýge qatysty túsinik berdi, dep habarlaıdy QazAqparat tilshisi.

Vıtse-mınıstr Nur-Sultan, Almaty jáne Shymkentte 5G jelisi boıynsha qanatqaqty joba qolǵa alynǵanyn eske saldy.

«Bul jumystar provaıderden qandaı resýrstar kerektigin aıqyndap beredi. Osy sharalardyń nátıjesi boıynsha 5G engiziledi. Ózderińiz bilesizder, Qazaqstan alǵashqylardyń biri bolyp 4G júıesin engizýdi bastaǵan edi, endi búginde 5G-di engizýge de erte qamdandyq», - dedi A. Ospanov.

Osy oraıda, ol atalǵan jańa júıeni elimizde keńinen taratý úshin 5G jelisimen jumys isteı alatyn qajetti qurylǵylar, ıaǵnı smartfondar bolýy tıis ekenin túsindirdi.

Aıta keteıik, bıyl kóktemde QR Premer-Mınıstri Asqar Mamın Qazaqstanda «besinshi býyn» baılanys jelisin engizý máseleleri týraly keńes ótkizdi.

El aýmaǵyn 5G qamtý úshin ınfraqurylym jasaý boıynsha jumystar aıasynda osy jyldyń sońyna deıin Nur-Sultan, Almaty, Shymkent qalalarynda pılottyq jobany iske asyrý josparlanǵan. Jalpy, 5G baılanys jelisimen adamdar sany 50 myńnan asatyn barlyq eldi mekender qamtylady dep kútilýde.

QR Tsıfrlyq damý, qorǵanys jáne aeroǵarysh ónerkásibi mınıstrliginiń málimetterinshe, Qazaqstan AQSh, Ońtústik Koreıa, Shveıtsarııa, Estonııa elderimen qatar jańa jelini engizýdi pılottaýǵa kóshken álem elderiniń ondyǵyna kiredi.