Qazaqstan 450 ıadrolyq synaqtyń zardabymen áli kúnge deıin betpe-bet kelip otyr

ASTANA. KAZINFORM — Prezıdent Qasym-Jomart Toqaev Astana halyqaralyq forýmynda elimizdiń ıadrolyq synaqtardan shekken zardabyna toqtaldy. 

— Búginde toǵyz eldiń arsenalynda jalpy sany 13 myń ıadrolyq oqtumsyq bar. Sarapshylar ony qoldaný yqtımaldylyǵy artyp kele jatqanyn eskertedi. Tipti, buǵan jazataıym qatelik, oqys oqıǵa nemese eskalatsııa sebep bolýy múmkin. Bir ǵana jarylystyń saldary joıqyn bolmaq. Ǵalymdar atom bombasy túsken jerin kúl-talqan etip qana qoımaı, jahandyq aýqymdaǵy klımat apatyna ákep soǵýy, egistik ataýlyny joıyp jiberýi múmkin ekenin aıtady. Onyń qasiretin biz jaqsy bilemiz. Jerimizde jasalǵan 450 ıadrolyq synaqtyń zardabymen Qazaqstan áli kúnge deıin betpe-bet kelip otyr, — dedi Memleket basshysy.

Prezıdent Qazaqstan beıbitshilik úshin Keńes ókimetinen muraǵa qalǵan ıadrolyq arsenaldan óz erkimizben bas tartqanyn eske saldy.

— Búginde jappaı qyryp-joıatyn ıadrolyq jáne bıologııalyq qarýdy taratpaý ustanymyn jaqtaımyz, — dedi Qasym-Jomart Toqaev.

Aıta keteıik, elordada Memleket basshysy Qasym-Jomart Toqaevtyń qatysýymen Astana halyqaralyq forýmy ótip jatyr. 

Forýmǵa 7 000-nan astam qatysýshy tirkelgen. Eýropa, Ortalyq Azııa, Taıaý Shyǵys pen Afrıka elinen BUU, AAU, HKU jáne DZMU sııaqty jetekshi halyqaralyq uıymdardyń atynan 160-tan astam spıker shaqyrylǵan. Eki kún boıy olar túrli salanyń sarapshylarymen birlesip, memleketaralyq yntymaqtastyq modelin, jańa jahandyq áriptestik qurýdyń keleshegin talqylaıdy.

Buǵan deıin forýmnyń mártebeli meımandar qatarynda Rýanda Respýblıkasynyń Prezıdenti Pol Kagame, Albanııa Premer-mınıstri Edı Rama, Horvatııa Respýblıkasynyń Premer-mınıstri Andreı Plenkovıch, Qatar Premer-mınıstri — Syrtqy ister mınıstri sheıh Muhammed ben Abdýlrahman Ál Tánı bar ekeni habarlanǵan bolatyn. 

Plenarlyq otyrysty Jibek joly telearnasynan tikeleı efırde kórýge bolady.