Qazaqstan 4 jylda 444 lokomotıv satyp alady

ASTANA. KAZINFORM –Kólik mınıstri Marat Qarabaev Úkimet otyrysynda keler jyly taǵy 187 lokomotıv satyp alynatynyn aıtty. 

«Qazirgi ýaqytta lokomotıv parki 1 myń 807 lokomotıvten turady. Tozý deńgeıi – 61%. Jyljymaly quramnyń jumys qabiletin qamtamasyz etip, parktiń tozý deńgeıin tómendetý úshin bıyl 185 lokomotıv satyp alyndy. Kelesi jyly 187 birlik satyp alý josparlanǵan. Al odan keıingi úsh jylda taǵy 257 lokomotıv jetkiziledi», - dedi mınıstr.

Marat Qarabaevtyń sózinshe, bul lokomotıv tapshylyǵyn tolyq joıýǵa yqpal etedi.

«Júk vagondaryna toqtalatyn bolsaq, jalpy park 139 myń vagonnan turady. Bul naryqta 300-den astam jeke operator jumys isteıdi. Onyń ishinde «Qazaqstan temir jolyna» 38 myń vagon tıesili. Olar áleýmettik mańyzy bar tasymaldarǵa, ıaǵnı eldiń energetıkalyq sektoryna jáne halyqqa kómir jetkizýge jumyldyrylǵan. Bul rette, 2026 jylǵa deıin Ulttyq operator qosymsha 3 myń ashyq vagon satyp alýdy josparlap otyr. Onyń 800-i bıyl paıdalanýǵa berildi», - dedi vedomstvo basshysy. 

Buǵan deıin Kólik mınıstri Marat Qarabaev Úkimet otyrysynda temirjol vokzaldarynyń jaı-kúıine toqtalǵan edi. Onda mınıstr 59 temirjol vokzalynyń 54-i jóndeýdi qajet etetinin atap ótti.