Qazaqstan 4 memleketke bıdaı eksportyn arttyrdy
NUR-SULTAN. QazAqparat - Qazaqstan 2019 jyldyń qańtarynda 691,8 myń tonna bıdaı jáne bıdaı-qarabıdaı qospasyn (meslın) eksporttady. Bul 2018 jyldyń osy aıyndaǵy kórsetkishten 35,1% kóp. Eksport kólemi aqshalaı ekvıvalentte 116,7 mln dollardy qurap, ótken jylǵydan 52,5% artyq bolyp otyr, dep habarlaıdy QazAqparat tilshisi energyprom.kz saıtyna silteme jasap.
Osy jyldyń birinshi aıynda qazaqstandyq bıdaı eksportynyń kólemi boıynsha myna elder kósh bastap tur: Ózbekstan Respýblıkasy - 290,7 myń tonna (+27,2%), Tájikstan Respýblıkasy - 118,4 myń tonna (+73,1%) jáne Ázerbaıjan Respýblıkasy (4,7 esege artqan) - 80,1 myń tonna.
Eksporttyq baǵyttar tiziminde tórtinshi orynda Túrikmenstan tur. Bul elge qańtar aıynda 52,5 myń tonna bıdaı jóneltilgen. Reseı Federatsııasyna qazaqstandyq bıdaı eksporty 3,7 esege artyp, 25,9 myń tonnany qurady. Sondaı-aq Qyrǵyzstan Respýblıkasyna 10,9 myń tonna (10,1% kóp), Belarýs Respýblıkasyna 0,6 myń tonna (ótken jyldyń qańtary boıynsha málimetter joq) bıdaı jetkizildi.
Eseptik kezeńde bıdaı men bıdaı-qarabıdaı qospasy ózge taǵy 13 elge eksporttalǵan. Onyń jalpy kólemi 112,6 myń tonnany qurady.
TMD elderi úshin qazaqstandyq bıdaıdyń eksporttyq baǵasy 2019 jyldyń qańtarynda 32,7% ósse, álemniń basqa memleketterine 7,6% artqan. Jalpy osy jyldyń birinshi aıynyń qorytyndysy boıynsha bıdaıdyń eksporttyq baǵasy 24,6% kóterilgen.
Ashat Ahmetbekov
