Qazaqstan 4,25 mln tonna astyqty eksportqa shyǵarady
NUR-SULTAN. QazAqparat – Aǵymdaǵy maýsymnyń sońyna deıin Qazaqstan 4,25 mln tonna astyqty eksportqa shyǵarady. Bul týraly Qazaqstannyń astyq odaǵynan málim etti, dep habarlaıdy QazAqparat tilshisi.
«Qazaqstan astyq odaǵy 2022 jyldyń 1 qańtaryndaǵy jaǵdaı boıynsha astyqtyń bastapqy qoryn 8,3 mln tonna mólsherinde baǵalaıdy. Reseıden 1,4 mln tonna ımportty (2022 jyldyń 1 qyrkúıegine deıin) eskergende astyqtyń jalpy usynymy 9,7 mln tonnany quraıdy. Aǵymdaǵy maýsymnyń sońyna deıingi ishki tutyný kólemi – 3,9 mln tonna. Onyń ishinde nan pisirý úshin 0,46 mln tonna bıdaı qajet. Al qalǵan 3,5 mln tonna bıdaı mal azyǵyna, un jáne makaron ónimderin óndirýge jumsalady», - delingen atalǵan odaq taratqan málimette.
Odaq aqparatyna sáıkes, aǵymdaǵy maýsymnyń sońyna deıin 4,25 mln tonna bıdaı men astyq balamasyndaǵy un eksporttalady. Onyń 3 mln tonnasyn bıdaı jáne naqty salmaqtaǵy 0,9 mln tonna un quraıdy. Qorytyndysynda aǵymdaǵy maýsymnyń sońyna deıingi jalpy suranys kólemi – 8,2 mln tonna. Jańa maýsymǵa ótetin bıdaı qory shamamen 1,5 mln tonnaǵa teń jáne bul sońǵy 4 maýsymdaǵy eń joǵary kórsetkish.
Іshki naryqtaǵy astyqtyń 1 tonnasynyń baǵasy 115-118 myń teńgeni qurap otyr. Bul rette Reseıden ımporttalatyn astyqtyń 1 tonnasy 116 myń teńgeni quraıdy.
