Qazaqstan 32 memleketpen jáne Eýropalyq Odaqpen balalar alımentin óndirip alý boıynsha yntymaqtasatyn bolady
ASTANA. QazAqparat - Qazaqstan 32 memleketpen jáne Eýropalyq Odaqpen balalar alımentin óndirip alý boıynsha yntymaqtasatyn bolady. Bul týraly búgin Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysynda málim boldy. Onda depýtattar «Balalarǵa alımentterdi jáne otbasyn kútip-baǵýdyń basqa da nysandaryn óndirip alýdyń halyqaralyq tártibi týraly konventsııany ratıfıkatsııalaý týraly» zań jobasyn talqylaǵan bolatyn.
Konventsııanyń maqsaty - balalarǵa alımentterdi jáne otbasyn kútip-baǵýdyń basqa da nysandaryn óndirip alýdyń tıimdi halyqaralyq tártibin qamtamasyz etý, atap aıtqanda Ýaǵdalasýshy memleketterdiń organdary arasynda ózara is-qımyldyń ámbebap júıesin ornatý bolyp tabylady. Budan bólek, qujat aıasynda alımentter týraly sheshimderge qatysty beriletin ótinishterdiń qoljetimdiligi qamtylyp, alımentter týraly sheshimderdi dereý májbúrlep oryndatý úshin tıimdi sharalardy aıqyndaý kózdeledi.
Ádilet vıtse-mınıstri Elvıra Azımovanyń aıtýynsha, Qazaqstan balalar quqyn qorǵaýdy basym baǵyttardyń biri retinde aıqyndaǵan. Sondyqtan da, konventsııany ratıfıkatsııalaý elimizde júzege asyp jatqan saıasatqa sáıkes keledi. «Zań jobasyn qabyldaý arqyly biz alımentterdi óndirip alý boıynsha 32 memleketpen jáne Eýropalyq Odaqpen yntymaqtastyqty arttyratyn bolamyz. Sonymen qatar, qujatty qabyldaý Konstıtýtsııaǵa da, zańnamalarǵa da qaıshy emes», - dedi vıtse-mınıstr.
Tutastaı alǵanda, Konventsııa normalary 21 jasqa deıingi bala - ata-ana arasyndaǵy qatynastardan týyndaıtyn alımenttik mindettemelerge, sondaı-aq, jubaıyn kútip-baǵý týraly sheshimdi tanýǵa jáne oryndatýǵa qatysty qoldanylady.
Budan bólek, kez kelgen Ýaǵdalasýshy memleket 18 jasqa tolmaǵan adamdarǵa Konventsııanyń qoldanylý aıasyn shekteý quqyǵyn ózine qaldyra alady. Osyndaı eskertýdi jasaǵan Ýaǵdalasýshy memlekettiń kórsetilgen eskertýmen jasy alyp tastalǵan adamdarǵa Konventsııanyń qoldanylýyn talap etýge quqyǵy bolmaıdy.
Zań jobasy palatanyń aldaǵy ýaqytta ótetin jalpy otyrysyna shyǵarylatyn bolady.
