Qazaqstan 30 jyl ishinde orta derjava deńgeıine kóterildi – saıasattanýshy
ASTANA. KAZINFORM – Qazaqstan kópvektorly saıasatty ustanýdyń nátıjesinde qoǵam qaýipsizdigin qamtamasyz etip otyr jáne halyq senimi bar. Bul pikirdi saıasattanýshy, halyqaralyq qatynastar boıynsha sarapshy Rızzat Tasym Kazinform agenttiginiń «BIZDIÑ ORTA» podkastynda keltirdi.
- Halyqaralyq qatynastardaǵy oqıǵalarmen salystyrmaly túrde aıtqanda, Qazaqstannyń syrtqy saıasaty birden kózge túsedi. Birinshiden, halyqaralyq qatynastarda egemendik erozııasy degen túsinik paıda boldy, ıaǵnı memleket emes áreket etýshi sýbektiler paıda boldy. Jalpy adamdar men memleket arasyndaǵy baılanys, qoǵamda bolyp jatqan úrdister qatty áser etip jatyr, sonyń áserinen túrli saıası ıdeıa, qundylyqtar boıynsha bóliný jıilep ketti. Osyndaı ortada qoǵamyna qolaıly saıasat júrgizý óte qıyn, - dedi Rızzat Tasym áńgimelesý barysynda.
Saıasattanýshynyń paıymdaýynsha, Qazaqstan ulttyq múddeni qorǵap, kópvektorly saıasatty laıyqty atqaryp kele jatyr.
- 30 jyldan astam ýaqyt ishinde, shynymen de halyqaralyq qatynastar sýbektisinde endi ǵana táı-táı basqan memleket orta derjava deńgeıine deıin kóterildi. Bul Qazaqstannyń ózindik moıyndaýy emes, halyqaralyq qaýymdastyqtyń Qazaqstannyń deńgeıin moıyndaýy. Ekinshiden, ishki aýdıtorııa turǵysynan qarasaq, Qazaqstan júrgizip otyrǵan kópvektorly saıasatty men tolyqtyrýshy edim, pragmatıkalyq kópvektorly saıasat desek, oǵan qoǵam ishinen ishki senim paıda boldy. Óıtkeni, kez kelgen syrtqy saıasattyń maqsaty – ulttyq qaýipsizdikti qamtamasyz etý, - deıdi ol.
Sondaı-aq sarapshy kópvektorly saıasat, qoǵamda qaýipsizdikti qamtamasyz etip otyrǵanyn, sonyń arqasynda halyq senimi baryn aıtyp otyr.
- Qazir kez kelgen saıası bılik Qazaqstandaǵy syrtqy saıasatty birjaqty, bir memlekettiń múddesine qaraı yǵystyratyn bolsa nemese sondaı oı tastaǵannyń ózinde, eń qyzyǵy buǵan halyqtyń ózi qarsy bolady. Bul kópvektorly saıasatty ustanýshylarǵa úlken mysal, ekinshi jaǵynan halyqaralyq qaýymdastyqta da Qazaqstanǵa degen, Qazaqstannyń saıasatyna degen senim paıda boldy, ıaǵnı osy ýaqyt aralyǵynda halyqaralyq qaýymdastyqtyń Qazaqstan usaq, qysqamerzimdi paıda úshin uzaq merzimdi strategııalardy qurbandyqqa shalmaıtynyna kózi jetti. Kerisinshe, baıypty, baısaldy saıasat júrgize alady, onymen uzaqmerzimdi qarym-qatynas ornatýǵa bolady, odaqtastyq máseleler boıynsha da senim artýǵa bolady degenniń arqasynda Qazaqstan jahandyq máselelerge aralasyp otyr, - dep tolyqtyrdy R. Tasym.
Osyǵan deıin saıasattanýshy Denıs Jılıaevtiń Armenııa premer-mınıstri Nıkol Pashınıannyń Qazaqstanǵa saparyna qatysty pikirin bergen edik.