Qazaqstan 30 tonna karantındi ónimdi Qyrǵyzstanǵa keri qaıtardy
QR Aýyl sharýashylyǵy mınıstrliginiń baspasóz qyzmeti taratqan aqparatqa sáıkes, aǵymdaǵy jylǵy 11-17 naýryz aralyǵynda QR AShM Agroónerkásip keshenindegi memlekettik ınspektsııa komıtetiniń memlekettik ınspektorlary Qyrǵyz Respýblıkasynan jetkizilgen fıtosanıtarlyq táýekeli joǵary karantınge jatatyn ónimderdi tekserý barysynda ósimdik karantıni salasyndaǵy Qazaqstan Respýblıkasynyń jáne Eýrazııalyq ekonomıkalyq odaqtyń zańnamasyn buzýdyń 3 faktisin anyqtady.
Karantındik ónimge jatatyn 30 tonna qyryqjapyraq pen 2 tonna kartop respýblıka aýmaǵyna mindetti ilespe fıtosanıtarlyq sertıfıkatsyz jetkizilgen. Ósimdik karantıni salasyndaǵy Qazaqstan Respýblıkasynyń zańnamasyna sáıkes, atalǵan ónimderdi respýblıka aýmaǵyna ákelýge jáne satýǵa tyıym salynady.
Zań buzýshylar ákimshilik jazaǵa tartyldy. Al salmaǵy 30 tonnadan asatyn karantınge jatatyn ónim Qyrǵyz Respýblıkasy aýmaǵyna qaıtaryldy.
Aıta keteıik, buǵan deıin osy jyldyń aqpan aıynda Qazaqstannan Qyrǵyzstanǵa 70 tonnadan astam karantındi almalar qaıtarylǵan bolatyn.
Odan keıin, 22 aqpan men 9 naýryz aralyǵynda karantınge jatqyzylǵan 120 tonna ónim Reseı Federatsııasyna, 3-7 naýryz aralyǵynda Qyrǵyzstanǵa 23 tonna ónim qaıtarylǵan edi.Oǵan Qazaqstannyń jáne Eýrazııalyq ekonomıkalyq odaqtyń fıtosanıtarlyq zańnamasyn buzý sebep bolǵan.
