Arnaıy ekonomıkalyq aımaqtardy basqarýǵa shetel kompanııalaryn da tartýǵa bolady — Prezıdent
ASTANA. KAZINFORM — Arnaıy ekonomıkalyq aımaqtardy basqarýǵa shetel kompanııalaryn da tartýǵa bolady. Bul týraly Memleket basshysy Qasym-Jomart Toqaev Qazaqstan halqyna Joldaýynda aıtty.
— Taǵy bir másele. Óńirlerge ınvestıtsııa tartý barysynda arnaıy ekonomıkalyq aımaqtar aıryqsha ról atqarady. Alaıda olardyń kóbiniń jumysy máz emes. Bul másele boıynsha áńgimeler talaı ret aıtyldy. Úkimet arnaıy ekonomıkalyq aımaqtardyń tıimdiligin arttyrý úshin tereń saraptama jasap, túbegeıli sharalar qabyldaýǵa daıyn bolýy kerek. Arnaıy ekonomıkalyq aımaqtardy basqarýǵa jeke kompanııalardy, qajet bolsa, shetel kompanııalaryn tartýǵa bolady. Áleýmettik-kásipkerlik korporatsııalar aımaqtardyń ekonomıkalyq ósimin arttyratyn qozǵaýshy kúsh bolýǵa tıis. Biraq, kóbi kommýnaldyq múlikterdi basqarýmen jáne asa mańyzdy emes jobalardy júzege asyrýmen shektelip otyr. Olardyń aımaq ekonomıkasyna áseri shamaly, — dedi Memleket basshysy.
Prezıdent Úkimet osyndaı korporatsııalardy tolyqqandy damý ınstıtýtyna aınaldyrýy kerektigin basa aıtty.
— Investıtsııa tartý — ortalyq atqarýshy organdardyń ǵana mindeti emes. Osy mańyzdy jumysqa jergilikti bılik te atsalysyp, bári jumyla jumys isteýge tıis. Ákimderdiń aımaqtaǵy ınvestıtsııalyq ahýalǵa tikeleı jaýapkershiligin belgileý kerek. Strategııalyq josparlaý jáne reformalar agenttigi aımaqtardyń ınvestıtsııalyq tartymdylyq ındeksin engizýge tıis. Múmkin, bul jumysqa táýelsiz sarapshylardy tartqan jón bolar. Biraq, qazirgi basty másele: joǵary ınflıatsııa ekonomıkalyq kórsetkishter men halyqtyń tabysyn «jutyp qoıyp» jatyr. Onyń daıyn turǵan sheshimi joq, bul — kóptegen memleket betpe-bet kelip otyrǵan túıtkil. Másele bárine ortaq bolǵanmen, ol bizdiń jaǵdaıda aıryqsha sezilip otyr. Osy makroekonomıkalyq qursaýdan shyǵýymyz kerek, — dedi Qasym-Jomart Toqaev.
Memleket basshysy qıyndyqtar kúni keshe ǵana paıda bolmaǵynan nazar aýdartty.
— Ony sheshý úshin álemdegi ozyq tájirıbelerdi eskerip, jurtqa unaı bermeıtin sharalar qabyldaýǵa jáne onyń jaýapkershiligin kóterip alýǵa daıyn bolý qajet. Úkimet pen Ulttyq bank memlekettik aýqymdaǵy mindetti aldyna qoıǵan birtutas komanda retinde jumys isteýi kerek. Qazir árkim kórpeni ózine qaraı tartatyn kez emes, — dedi Prezıdent.
Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.
Kazinform saıty tikeleı efırmen qatar, jazbasha translıatsııa da jasaıdy.
Sondaı-aq Joldaý mátinin agenttiktiń telegram arnasynan oqýǵa bolady.