Qazaqstan 3 elmen birlesip Kaspıı arqyly júk tasıtyn birlesken kásiporyn qurmaq

NUR-SULTAN. QazAqparat – Qazaqstan Ázerbaıjan, Grýzııa jáne Túrkııa elderimen Kaspıı arqyly júk tasıtyn birlesken kásiporyn qurmaqshy, dep habarlaıdy QazAqparat tilshisi.

Bul týraly QR Indýstrııa jáne ınfraqurylymdyq damý mınıstri Qaıyrbek Óskenbaev Úkimet otyrysynda málim etti.

«Biz, eksporttyq jáne tranzıttik júkterdi tasymaldaý úshin balamaly baǵdarlar men dálizderdi pysyqtadyq. Mınıstrlik júkterdi jetkizýdiń logıstıkalyq tizbekteriniń buzylýyn boldyrmaý boıynsha jedel sharalar qabyldady. Eksporttyq júkter Latvııa porttaryna jáne Transkaspıı halyqaralyq kólik baǵdaryna baǵyttalady. Transkaspıı baǵdary sheńberinde Ázerbaıjan, Grýzııa jáne Túrkııa elderimen birlesken kásiporyn qurý týraly kelisimge qol jetkizildi», - degen mınıstr «Aqtaý teńiz porty» arnaıy ekonomıkalyq aımaǵynda «Konteınerlik hab» qurý josparlanyp otyrǵanyn jetkizdi.

«Osy jobany iske asyrý úshin Sıngapýrlyq PSA International kompanııasymen kelissózder júrgizildi.

Sonymen qatar Maersk, MSC jáne Cosco Shipping sııaqty álemdik konteınerlik operatorlarynyń parkin tartý kózdelýde. Jeke bıznesti tarta otyryp, saýda flotyn 4 parommen tolyqtyrý josparlanýda.

Bıyl shamamen 4 mln tonna eksporttyq júkti qaıta baǵdarlaýdy eskere otyryp, Aqtaý jáne Quryq teńiz porttary arqyly tasymal kólemin 10 mln tonnaǵa deıin jetkizý josparlanýda», -dedi Qaıyrbek Óskenbaev.