Qazaqstan 28 eldiń stýdentterine shákirtaqy, ǵalymdaryna grant berýge daıyn
BAKÝ. KAZINFORM — Qasym-Jomart Toqaev AÓSShK VII sammıtinde 28 eldiń stýdentteri men ǵalymdaryna qoldaý kórsetýdi usyndy, dep habarlaıdy Aqordanyń baspasóz qyzmeti.
— Budan myń jyldan astam ýaqyt buryn uly fılosof ári ǵalym ál-Farabı qoǵamnyń qýaty onyń halqynyń bilimi men adamgershilik qasıetterinde ekenin aıtqan. Sondyqtan Uıymǵa múshe memleketterdi AÓSShK-niń adamı kapıtal salasyndaǵy áriptestik ornatýǵa shaqyramyn. Maqsat — jas urpaqty tehnologııalyq, ekonomıkalyq jáne geosaıası jańǵyrýlar ekpinimen sát saıyn ózgerip jatqan álemge beıimdeý. Biz osy mańyzdy máseleni sheshýge úles qosý úshin sarapshylyq tájirıbemizdi, mańdaıaldy ýnıversıtetter men ǵylymı-zertteý uıymdarynyń áleýetin usynýǵa daıynbyz. Kelesi jyly qaýipsizdik pen senimdi nyǵaıtý salasyndaǵy ǵylymı zertteýge arnalǵan stıpendııalyq baǵdarlama iske qosylýy yqtımal. Qazaqstan Uıymǵa múshe 28 memlekettiń stýdentterine shákirtaqy usynýǵa, sondaı-aq ǵalymdarǵa zertteý granttaryn berýge ázir, — dedi Memleket basshysy.
Qazaqstan Prezıdenti sóz sońynda Ázerbaıjannyń Azııadaǵy ózara is-qımyl jáne senim sharalary jónindegi keńeske tóraǵalyǵyn tabysty jalǵastyrýyna tilektes ekenin jetkizdi. Sondaı-aq búgin qabyldanǵan Baký deklaratsııasy aldaǵy jumysqa berik negiz qalaıtynyna senim bildirdi.
Buǵan deıin Toqaev preventıvti dıplomatııa tetigin iske qosýdy usyndy.
