Qazaqstan 26 munaı-gaz ýchaskesin aýktsıonǵa shyǵarady
ASTANA. KAZINFORM — QR Energetıka mınıstrligi jer qoınaýyn paıdalaný, ıaǵnı munaı-gaz ýchaskelerin ıgerý quqyǵyn alý úshin elektrondyq aýktsıon ótkizedi.
Aýktsıonǵa shyǵarylatyn ýchaskeler Qostanaı, Aqtóbe, Qyzylorda, Atyraý, Pavlodar, Ulytaý jáne Batys Qazaqstan oblystarynyń aýmaqtarynda. Saýda 2026 jyldyń 18 qarashasynda e-qazyna.kz saıtynda ótedi. Al ótinimder atalǵan portalda 5 qazanǵa deıin qabyldanady. Aýktsıonǵa qatysý úshin 100 AEK mólsherinde jarna tólenýi kerek.
Sonymen qatar, Qazaqstan birqatar shart qoıyp otyr. Munaı-gaz ýchaskelerin ıgerýshiler:
• Kómirsýtekterdi óndirý kezeńinde jer qoınaýyn paıdalanýshynyń ótken jyldyń qorytyndylary boıynsha kómirsýtekterdi óndirýge jumsaǵan shyǵyndarynyń 1%-y mólsherinde qazaqstandyq kadrlardy oqytýdy qarjylandyrýdy júzege asyrýy tıis;
• Ótken jyldyń qorytyndylary boıynsha jer qoınaýyn paıdalanýshy kómirsýtekterdi óndirý kezeńinde shekken óndirý shyǵyndarynyń 1%-y mólsherinde Qazaqstan Respýblıkasynyń aýmaǵynda óndirý kezeńinde ǵylymı-zertteý, ǵylymı-tehnıkalyq jáne (nemese) tájirıbelik-konstrýktorlyq jumystardy qarjylandyrýy kerek;
• Kelisimshart boıynsha kómirsýtekterdi óndirý kezeńinde ótken jyldyń qorytyndylary boıynsha jer qoınaýyn paıdalanýshy shekken óndirýge arnalǵan shyǵyndardyń 1%-y mólsherinde óńirdiń áleýmettik-ekonomıkalyq damýyna jáne onyń ınfraqurylymyn damytýǵa qarjy salýy qajet.
Budan bólek kórsetiletin qyzmetter, taýarlar jáne kadrlyq quramǵa qatysty qoıylǵan naqty talaptar bar.
Aıta keteıik, buǵan deıin jer qoınaýyn paıdalaný salasynda 40 mln dollarlyq ınvestıtsııalyq joba qoldaý tapqanyn jazǵanbyz.
