Qazaqstan 25 myń tonna balyq ónimderin eksporttaıdy

ASTANA. QazAqparat – Elimizde jyl saıyn 45 myń tonna balyq aýlanady. Bul týraly Parlament Májilisindegi Úkimet saǵatynda QR Ekologııa, geologııa jáne tabıǵı resýrstar mınıstri Serikqalı Brekeshev aıtty, dep habarlaıdy QazAqparat tilshisi.

«Qazaqstannyń tabıǵı sý qoımalarynda jyl saıyn shamamen 40-45 myń tonna balyq aýlanady. Bul kórsetkish jyl saıyn ósip keledi. Sonymen qatar byltyr 15 myń tonnaǵa jýyq balyq ósirildi. Bul 2017 jylǵy deńgeıden 5,5 ese joǵary», - dedi S. Brekeshev.

Onyń aıtýynsha, Qazaqstanǵa shamamen 41 myń tonna muhıt pen teńiz balyq túrleri ákelinedi.

«Budan bólek, jyl saıyn 25 myń tonnaǵa jýyq balyq jáne balyq ónimderi eksporttalady. Onyń negizgi úlesi tereń óńdelgen ónim. Bul rette, otandyq balyq ónimderi álemdik naryqta básekege qabiletti. Negizgi mindet - balyqtyń ishki naryqtaǵy úlesin arttyrý, sondaı-aq teńizde balyq aýlaýdy ıgerý ári taýarlyq balyq ósirý sharýashylyǵyn damytý esebinen eksporttyq áleýetti odan ári ulǵaıtý jáne birtindep ımportty almastyrý», - dedi mınıstr.