Qazaqstan 236,9 mln dollardyń balalarǵa arnalǵan zattaryn ımporttady
QazAqparattyń resmı saýalyna oraı berilgen elimizdiń Ulttyq ekonomıka mınıstrliginiń jaýabynda ótken jyly 71 mln dollarǵa shetelden úshaıaqty velesıpedter, kıkskýterler, pedaldi avtomobılder, qýyrshaqqa arnalǵan arbalar, qýyrshaqtar jáne basqa da oıynshyqtar satyp alynǵandyǵy aıtylǵan. Importtyń basym bóligi Eýrazııalyq ekonomıkalyq odaqqa kirmeıtin elderdiń úlesine tıesili. Balalarǵa arnalǵan taýarlardyń 55 protsenti alys shetelderden, onyń ishinde 52 protsenti Qytaıdan, al 45 protsenti EAEO elderinen ımporttalǵan.
Ústimizdegi jyldyń qańtar-naýryz aıaǵynda elimizde 14,8 mln dollardyń oıynshyqtary jetkizildi. Bul rette ımporttalǵan ónimniń negizi úlesi, atap aıtqanda 52 protsenti EAEO elderine tıesili boldy. Onyń ishinde 49 protsenti Reseıden, 48 protsenti alys shet elderden jetkizilgen.
Jyl basynan beri Qazaqstanǵa 119,5 mln dollardyń jórgekteri men jaıalyqtary ákelindi. Importtyń basym bóligi Reseıdiń enshisinde. Shamamen taýardyń 20 protsenti Vengrııa men Polshadan ımporttalǵan.
2016 jyly 18,7 mln dollarǵa 120 myń dana balalar tósegi elimizge ákelinse, onyń basym bóligin, atap aıtqanda 35,4 paıyzyn Reseı, 29,2 protsentin Belarýs jáne 10,3 protsentin Italııa ónimderi qurap otyr. Osy jyldyń ishinde ǵana Reseı, Belarýs jáne Italııadan 3,9 mln dollardyń 22,7 myń dana tósegi jetkizildi.
Munan bólek, 2016 jyly Qytaı (58,9 protsent), Reseı (19,3) jáne Polshadan (15,8) 6,6 mln. dollarǵa 214 myń balalar arbasy ákelindi. Al osy jyldyń basynan beri 2,4 mln dollarǵa taǵy da 76 myń arba ımporttaldy. Bul rette elimizge jetkiziletin ónimniń basym bóligi Qytaıdan (66,1%), Polshadan (20,1%) jáne Reseıden (11,6%) satyp alynǵan.
