Qazaqstan 2,3 mln tonna astyq eksporttady: Qytaı men Aýǵanstanǵa jetkizilim kúrt ósti
ASTANA. KAZINFORM — Qazaqstandyq astyqqa shetel suranysy artyp keledi. 2026 jyldyń qyrkúıek–qazan aılarynda el 2,26 mln tonna jańa ónim astyǵyn eksporttap, ótken jylǵy kórsetkishten 2%-ǵa asyp tústi. Ásirese Qytaı men Aýǵanstanǵa jetkizilim kúrt ósken. Al qazaqstandyq bıdaı eksporty toǵyz aıda 6,1 mln tonnaǵa jetti. Bul týraly AShM málim etti.
«Qazaqstan temir joly» UK» aktsıonerlik qoǵamy derekterine sáıkes, 2026 jylǵy qyrkúıek - qazan aralyǵynda shetelge 2 mln 262 myń tonna astyq jóneltildi. Bul ótken maýsymnyń sáıkes kezeńindegi kórsetkishten 2%-ǵa joǵary.
AShm málimetinshe byltyr atalǵan merzimde 2 mln 219 myń tonna astyq eksporttalǵan eken.
Eksport kóleminiń ósimi qalyptasqan ótkizý naryqtarynda da, jańa baǵyttarda da baıqalady.
Máselen, dástúrli eksport naryqtaryna astyq jetkizý kólemi 1,2%-ǵa artyp, 1 mln 430 myń tonnany qurady. Atap aıtqanda, Ózbekstanǵa jóneltilgen astyq kólemi 1,3%-ǵa ósip, 1 mln 63 myń tonnaǵa, Tájikstanǵa jetkizilim 19%-ǵa artyp, 351 myń tonnaǵa jetti.
Qytaı men Aýǵanstan baǵyttarynda da aıtarlyqtaı qarqyn tirkeldi. Qytaıǵa astyq eksporty 2,6 esege artyp, 145 myń tonnadan 373 myń tonnaǵa deıin, al Aýǵanstanǵa jetkizilim 1,9 esege ósip, 104 myń tonnadan 200 myń tonnaǵa deıin ulǵaıdy.
Qazaqstandyq bıdaı eksporty boıynsha da ósim saqtalyp otyr. Memlekettik kirister komıtetiniń málimetinshe, 2026 jylǵy qańtar–qyrkúıek aılarynda bıdaı eksportynyń kólemi 6,1 mln tonnaǵa jetip, ótken jyldyń sáıkes kezeńimen salystyrǵanda 15%-ǵa artty (5,3 mln tonna).
Qazaqstandyq bıdaıdyń negizgi satyp alýshylary qatarynda Ózbekstan, Tájikstan jáne Aýǵanstan bar. Ózbekstanǵa eksport 49%-ǵa ósip, 3,8 mln tonnany, Tájikstanǵa jetkizilim 13,6%-ǵa artyp, 1 mln tonnany qurady. Al Aýǵanstanǵa bıdaı eksporty 3,4 esege ulǵaıyp, 663 myń tonnaǵa jetken.
Sonymen qatar qazaqstandyq bıdaı eksporttalatyn elderdiń aýmaǵy da keńeıip keledi. Týnıske 23,3 myń tonna, Frantsııaǵa 6 myń tonna bıdaı jóneltildi. Iranǵa eksport kóleminiń de edáýir óskeni baıqalady. Bul elge jetkizilgen bıdaı kólemi 67 myń tonnany qurady.
Astyq eksportynyń ulǵaıýy qazaqstandyq astyqqa degen turaqty suranysty jáne otandyq ónimniń halyqaralyq naryqtardaǵy pozıtsııasynyń nyǵaıyp kele jatqanyn kórsetedi.
Aıta keteıik, bıylǵy egin jınaý naýqanynyń qorytyndysy boıynsha Qazaqstanda 24,3 mln tonna astyq jınaldy. Bul — sońǵy 15 jyldaǵy eń joǵary kórsetkishterdiń biri. Osy ýaqyt aralyǵynda mundaı nátıjeden joǵary kórsetkish tek eki ret tirkelgen.
