Qazaqstan 2050 jylǵa qaraı balamaly jáne jańartylatyn energııa úlesin 50 paıyzǵa jetkizýge nıetti - N.Qapparov
ASTANA. 5 maýsym. QazAqparat - Qazaqstan 2050 jylǵa qaraı balamaly jáne jańartylatyn energııa úlesin 50 paıyzǵa jetkizýdi maqsat etip otyr.
Bul týraly búgin QR Prezıdenti janyndaǵy Ortalyq kommýnıkatsııalar qyzmeti uıymdastyrǵan brıfıngte QR Qorshaǵan ortany qorǵaý mınıstri Nurlan Qapparov málim etti.
«Elektr energetıkada biz balamaly jáne jańartylatyn energııanyń úlesin 2030 jylǵa qaraı - 30, al 2050 jylǵa qaraı 50 paıyzǵa jetkizý maqsatyn qoıyp otyrmyz»,- dedi ol.
Mınıstrdiń atap ótýinshe, energııa tıimdilikti joǵarylatýǵa baǵyttalǵan sharalardy júrgizý nátıjesinde elektr qýatyn óndirý qajettiligi 2030 jylǵa qaraı - 13, al 2050 jylǵa qaraı 10 paıyzǵa azaıatyn bolady.
Esterińizge sala keteıik, 30 mamyr kúni Memleket basshysy Nursultan Nazarbaev Qazaqstan Respýblıkasynyń «jasyl ekonomıkaǵa» kóshýi jónindegi tujyrymdama týraly» Jarlyqqa qol qoıǵan bolatyn. «Jasyl ekonomıka» elimizdiń ornyqty damýyn qamtamasyz etýdiń mańyzdy quraldarynyń biri bolyp sanalada. Atalǵan tujyrymdama aıasynda 2050 jylǵa qaraı JІÓ 3 paıyzǵa artyp, 500 myńnan astam jańa jumys orny qurylady. Tutastaı alǵanda, «jasyl ekonomıkaǵa» kóshý úshin qajetti ınvestıtsııalar kólemi jyl saıyn JІÓ-niń shamamen 1 paıyzyn quraıdy. Al bul jylyna 3-4 mlrd. AQSh dollaryna teń.
