Qazaqstan 2050 jylǵa qaraı ıadrolyq energııa tutyný kólemin 3 ese arttyrýdy kózdeıdi — AIF
ASTANA. KAZINFORM — Energetıka mınıstriniń orynbasary Álibek Jamaýov Astana halyqaralyq forýmynda Qazaqstannyń energetıka salasyndaǵy saıasaty týraly málimet berdi.
— 2035 jylǵa qaraı elektr energııasyn tutynýdyń jyl saıynǵy kólemi ósetinin eskersek, qoldaǵy qýattardy jańǵyrtyp, shamamen 26 GVt kólemine jetkizý qajet. Onyń ishinde jańartylatyn energııa kózderi esebinen 25% kóleminde jańa qýattardy iske qosýdy josparlap otyrmyz. Qazaqstannyń Parıj kelisimi aıasynda 2060 jylǵa qaraı kómirtegi beıtaraptyǵyna qol jetkizý týraly órshil maqsaty bar. Osyǵan baılanysty biz ulttyq energııa teńgerimine jańartylatyn energııa kózderiniń úlesin 2030 jylǵa qaraı 15%-ǵa, 2050 jylǵa qaraı 50%-ǵa deıin ulǵaıtýdy josparlap otyrmyz. Sol úshin mınıstrlik jyl saıyn aýktsıondar ótkize bastady, — dedi ol.
Vıtse-mınıstr atom energetıkasy týraly sóz qozǵady.
— Atom energetıkasyna keletin bolsaq, Qazaqstan Bakýdegi Dúnıejúzilik klımat sammıtinde 2050 jylǵa qaraı ıadrolyq energııany paıdalaný kólemin 3 ese arttyrý týraly halyqaralyq deklaratsııaǵa qosylǵan. Ýran óndirý kólemi boıynsha álemde birinshi orynda turǵan elimizde atom energetıkasyn damytýǵa qajetti barlyq jaǵdaı bar, — dedi ol.
Aıta keteıik, elordada Astana halyqaralyq forýmy ótip jatyr.