«Qazaqstan - 2050» Jalpyulttyq qozǵalysy óziniń jańa jobalarymen tanystyrdy
ASTANA. QazAqparat - Bıyl «Qazaqstan - 2050» jalpyulttyq qozǵalysy aıasynda birqatar jańa jobalar júzege asyrylady. Olar: «Jasyl sabaq», «Innovatsııalyq jobalardyń ulttyq olımpıadasy», «Zııatker urpaq», «Qoǵamdyq sheberhanalar», «Kraýdsorsıng», «Solicitous Oil Worker», «Ujymdyq eriktilik» jáne «Korporatıvtik oqytý baǵdarlamasy» jobalary.
Atalǵan jobalar oılaý qabiletiniń transformatsııalanýyna, adamdardyń minez-qulyq modeliniń ózgerýine jáne azamattyq qoǵam ınstıtýttarynyń damýyna yqpalyn tıgizetin shara keshenderinen turady.
«Qazaqstan - 2050» jalpyulttyq qozǵalysy ókilderiniń aıtýynsha, bıylǵy jumystyń negizgi bóligi bilim berý jobalaryna arnalady. Bul azamattarda áleýmettik-jaýapkershilikke degen erekshe kózqarasty qalyptastyrýǵa septigin tıgizedi.
Barlyq jobalardyń arasynan tańdap, «Zııatker urpaq» jobasyn erekshe bólip aıta ketý kerek. Joba aıasynda 3 jyl ishinde 20 000 - nan asa mektep oqýshylary qamtylyp, 350 ashyq sabaqtar ótkizildi. Olardy elimizdegi túrli kásip salasynyń tabysty ókilderi júrgizgen. Bıik belesterdi baǵyndyrǵan bul azamattardyń ónegesi jas túlekterge úlgi bolyp, oqýynda ári bolashaq mamandyǵy boıynsha jetistikterge jol bastaǵan.
Sonymen qatar, Qozǵalys azamattardy «ashyq Úkimet» elektrondy portalymen tanystyratyn, azamattardyń memlekettik basqarý protsessine qatysýǵa jaǵdaı jasaıtyn, halyq pen bılik arasyndaǵy tıimdi dıalogty retteıtin «Ashyq arna» jobasyn daıyndady. Bul joba da óziniń strategııalyq mańyzdylyǵymen erekshe bolmaq.
«Jasyl sabaq» jobasy aıasynda qazirgi ýaqytta óte mańyzdy máselelerdiń biri - tabıǵı resýrstardy tıimdi paıdalaný kóteriledi. Bul jobany búkil respýblıka boıynsha bilim berý mektepterinde 100 000 -nan asa bastaýysh mektep oqýshylaryn qamtyp júzege asyrý josparlanǵan. Ádistemelik qúraldar retinde anımatsııa elementterimen balalarǵa ońaı túsiný úshin beıimdelip jasalǵan 5 taqyryptyq beınesabaqtar shyǵarylady.
«Qoǵamdyq sheberhanalar» qorshaǵan ortany saqtaýǵa baǵyttalǵan taǵy da bir joba. Qazir isten shyqqan turmystyq tehnıka úlken problema bolyp otyr. «Qoǵamdyq sheberhanalar» synamaly jobasy bul problemany sheshýge óz sheshimderin usynbaq: sheberhanada tehnıkany jóndeý jáne arnaıy qaıta óńdeý pýnktterine jóneltý múmkindigi bar.
«Qazaqstan - 2050» jalpyulttyq qozǵalysy - búgingi tańda on myńnan asa qazaqstandyqtardy biriktire alǵan progressıvti azamattyq bastamalardyń haby. Qazirdiń ózinde uıymnyń belsendiler sany 12 000-nan asady. Qozǵalys elimizdiń damýyna júıeli úles qosa alatyn jańa býyn ókilderinen jáne joǵary dárejeli mamandardan turady. «Kazaqstan - 2050» Jalpyulttyq qozǵalysy aıasynda ótken 4 jyl ishinde 40-tan asa áleýmettik jobalar júzege asyryldy. Olar 1 mıllıon azamatty qamtyp, ıaǵnı árbir 17-shi qazaqstandyqtyń ómirine yqpalyn tıgizdi.
Esterińizge sala keteıik, jalpyulttyq qozǵalys qurý ıdeıasy Memleket basshysynyń usynysy edi.
2013 jyly 29 qarashada «Bolashaq» stıpendııasynyń 20-jyldyǵyna arnalǵan Forým ótken bolatyn. Onda Elbasy N.Á. Nazarbaev: «Qazaqstan-2050» Strategııasy - bul bizdiń 21 ǵasyrdaǵy ulttyq ıdeıamyz. Ol bizdiń halyq umtylatyn uly isterge bastaıdy. Men sizdermen burynnan berý oıda júrgen ıdeıammen bóliskim keledi. «Bolashaq» baǵdarlamasy negizinde «Qazaqstan-2050» Jalpyulttyq qozǵalysyn qurýdy usynamyn», - degen edi.
Budan keıin 6 jeltoqsanda Astanadaǵy Nazarbaev ýnıversıtetinde bastamashyl azamattar toby «Qazaqstan-2050» jalpyulttyq qozǵalysynyń qurylǵanyn málimdedi.
