«Qazaqstan-2050» Strategııasyn tabysty júzege asyrǵan saıyn Adam damý ındeksi de joǵary bolmaq - A. Volkov
Búgin Astanada BUU Damý baǵdarlamasynyń «Ońtústiktiń órleýi: alýan túrli álemdegi adamı progress» atty ǵalamdyq baıandamasynyń aımaqtyq tusaýkeseri barysynda Syrtqy ister mınıstriniń orynbasary Alekseı Volkov osylaı málim etti.
Mınıstr orynbasarynyń aıtýynsha, 14 naýryzda Meksıkada «Ońtústiktiń órleýi: alýan túrli álemdegi adamı progress» atty jahandyq baıandamanyń resmı tusaýkeseri ótken. Al jahandyq baıandamamen qatar, óńirlik baıandamanyń tusaýkeserleri qazir álemniń bes elinde uıymdastyrylyp jatsa, sonyń biri búgin Astanada ótýde. «BUU DB bıylǵy adam damýy jónindegi baıandamasy naqty faktorlarǵa, jetken jetistikterge saraptama jasaı otyryp, álemdik damý túsinigine aıtarlyqtaı úles qosady, sondaı-aq jahandyq basqarýdaǵy saıası basymdyqtarǵa jol ashady dep bilemiz», - dedi A. Volkov. Onyń aıtýynsha, atalǵan aımaqtyq baıandama negizinen Shyǵys Eýropa men Shyǵys Azııa elderine negizdelgen.
«Memleket basshysy N. Nazarbaev usynǵan Qazaqstannyń 2050 jylǵa deıingi strategııalyq damýy da eń aldymen, árbir qazaqstandyqtyń ómir sapasyn artyrýǵa baǵyttalǵan. Sondyqtan da, bul strategııa Adam damýy ındeksiniń bazalyq túsinigimen jáne mánimen tereń úılesedi. Biz strategııany tabysty júzege asyrǵan saıyn, Qazaqstannyń Adam damý ındeksiniń kórsetkishi de joǵary bolmaq», - dedi A. Volkov.
