Qazaqstan 2036 jylǵa deıin bıotehnologııalardy damytýdyń jańa júıesin qalyptastyrmaq
ASTANA. KAZINFORM – Qazaqstanda ǵylymı ıdeıadan bastap, zerthanalyq ázirlemeni óndiriske engizý men praktıkalyq qoldanýǵa deıingi tolyq tsıkldi qamtıtyn bıotehnologııalardy damytýdyń jańa modeli qalyptastyrylmaq, dep habarlaıdy Densaýlyq saqtaý mınıstrligi.
Qazaqstan Respýblıkasynda bıotehnologııalardy damytýdyń 2036 jylǵa deıingi strategııasynyń jobasy Densaýlyq saqtaý mınıstrliginiń Ǵylymı-tehnıkalyq keńesi men Prezıdent janyndaǵy Ulttyq ǵylym akademııasynyń Almatyda ótken birlesken otyrysynda talqylandy.
Jıynǵa Densaýlyq saqtaý mınıstri Aqmaral Álnazarova, Prezıdent janyndaǵy Ulttyq ǵylym akademııasynyń prezıdenti Aqylbek Kúrishbaev, akademıkter, medıtsınalyq joǵary oqý oryndary men ǵylymı uıymdardyń basshylary, memlekettik organdardyń ókilderi, ǵalymdar men sarapshylar qatysty.
Aqmaral Álnazarova bıotehnologııalardy damytý ǵylymmen qatar, eldiń tehnologııalyq damýy úshin de mańyzdy baǵyt ekenin atap ótti.
– Búginde bizdiń aldymyzda jekelegen ǵylymı ázirlemelerden bilim men tehnologııalar naqty tájirıbede qoldanylatyn tolyqqandy júıege kóshý mindeti tur. Qazaqstannyń ǵylymı áleýeti joǵary. Endigi mindetimiz – otandyq ázirlemelerdiń suranysqa ıe tehnologııalarǵa aınalyp, azamattarymyzdyń densaýlyǵy men ómir sapasyn jaqsartýǵa qyzmet etýine jaǵdaı jasaý, – dedi Densaýlyq saqtaý mınıstri.
Onyń aıtýynsha, bul baǵytta ǵylym, bilim, densaýlyq saqtaý jáne óndiris múmkindikterin biriktirý mańyzdy. Perspektıvaly ázirlemeler zerthana deńgeıinde qalyp qoımaı, dıagnostıkada, emdeýde, óndiriste jáne adam ómirine tikeleı áser etetin basqa da salalarda praktıkalyq qoldanysqa engizilýi tıis.
Ulttyq ǵylym akademııasynyń prezıdenti Aqylbek Kúrishbaev strategııanyń negizgi mindetteriniń biri Qazaqstanda tolyq tehnologııalyq tsıkl júıesin qalyptastyrý ekenin aıtty.
– Strategııanyń basty nátıjesi – tek jańa tehnologııalardy ázirlep qana qoımaı, álemdegi úzdik sheshimderdi jedel ıgerýge, olardy ulttyq jaǵdaıǵa beıimdeýge, el ishinde óndirýge, qoldanýǵa jáne odan ári jetildirýge qabiletti tıimdi júıe qurý, – dedi Aqylbek Kúrishbaev.
Otyrys barysynda Ulttyq ǵylym akademııasynyń akademıkteri Vıacheslav Lokshın, Erlan Turyspekov, Amankeldi Sadanov jáne UǴA Ómir jáne densaýlyq týraly ǵylymdar ortalyǵynyń basshysy Marlen Esirkepov medıtsınalyq, agrarlyq jáne ónerkásiptik bıotehnologııalardy damytý boıynsha usynystaryn tanystyrdy.
Sarapshylar ǵylymı ınfraqurylymdy damytý, kadrlar daıarlaý, flagmandyq ǵylymı baǵdarlamalardy iske asyrý jáne otandyq ázirlemelerdi tıimdi engizý tetikterin qalyptastyrý máselelerine erekshe nazar aýdardy.
Densaýlyq saqtaý salasynda bıotehnologııalardy damytý medıtsınalyq ǵylym, dıagnostıka, farmatsevtıka jáne ómir týraly ǵylymdardyń basqa da baǵyttaryna jańa múmkindik bermek. Bul elimizdiń tehnologııalyq áleýetin nyǵaıtyp, zamanaýı otandyq sheshimderdiń qoljetimdiligin arttyrýǵa baǵyttalǵan.
Otyrys qorytyndysynda strategııa jobasy qoldaý tapty. Densaýlyq saqtaý mınıstrligine usynystardy qarastyryp, negizdelgen bastamalardy strategııa men ony iske asyrý jónindegi is-qımyl josparyn jetildirý kezinde eskerý usynyldy.
Qujatty ázirleý jumysy múddeli memlekettik organdardyń, ǵylymı uıymdar men sarapshylar qaýymdastyǵynyń qatysýymen jalǵasady.
Aıta keteıik, 2027 jylǵa deıin Qazaqstan óńirlerinde jańa travmatologııalyq ortalyqtar ashylady.
