Qazaqstan 2035 jylǵa qaraı 8,4 GVt «jasyl» generatsııany engizýdi josparlap otyr
ASTANA. KAZINFORM — Qazaqstan Eýrazııadaǵy negizgi energetıkalyq jáne tranzıttik ortalyqtardyń biri retindegi pozıtsııasyn nyǵaıtyp, munaı tasymalynyń halyqaralyq baǵyttaryn jáne «jasyl» energetıka jobalaryn damytyp keledi, dep jazady Kazinform tilshisi.
Bul týraly Qazaqstannyń energetıka mınıstri Erlan Aqkenjenov Baký energetıkalyq aptalyǵy aıasyndaǵy plenarlyq sessııada málimdedi.
Mınıstrdiń aıtýynsha, Qazaqstan úshin Ázerbaıjanmen yntymaqtastyq pen Baký–Tbılısı–Jeıhan (BTJ) munaı qubyry baǵytyn damytý mańyzdy basymdyqtardyń biri bolyp qala beredi. Bul baǵyt Kaspıı qubyr konsortsıýmyn (KQK) tolyqtyryp, eksport jetkizilimderin ártaraptandyrýǵa múmkindik beredi.
— Qazaqstan úshin BTJ baǵyty strategııalyq mańyzǵa ıe. Bul tek tasymal dálizi emes, Eýrazııadaǵy energetıkalyq qaýipsizdiktiń jańa arhıtektýrasynyń bir bóligi, — dedi Erlan Aqkenjenov.
Mınıstrdiń málimetinshe, BTJ arqyly qazaqstandyq munaı tasymalyn jylyna 1,5 mln tonnadan 2,2 mln tonnaǵa deıin arttyrý kózdelip otyr.
Al Kaspıı qubyr konsortsıýmy (KQK) Qazaqstan munaıyn eksporttaýda áli de negizgi baǵyt bolyp sanalady. 2025 jyly osy júıe arqyly 64,8 mln tonna munaı tasymaldanǵan.
Sessııa barysynda Qazaqstannyń 2035 jylǵa deıingi jańa energetıkalyq strategııasy men tómen kómirtekti ekonomıkaǵa kóshý máselelerine erekshe nazar aýdaryldy. Tıisti tujyrymdamaǵa sáıkes, el 8,4 GVt jańartylatyn energııa kózderi qýatyn iske qosýdy josparlap otyr.
Qazirgi ýaqytta Qazaqstanda jalpy qýaty shamamen 3,7 GVt bolatyn 169 jańartylatyn energııa nysany jumys isteıdi. Olar elektr energııasynyń shamamen 7 paıyzyn óndiredi. Jobalardy iske asyrýǵa Qytaı, BAÁ, Frantsııa jáne Germanııa sııaqty elderdiń halyqaralyq kompanııalary tartylǵan.
Sonymen qatar mınıstr «Kaspıı jasyl energetıkalyq dálizi» jobasynyń mańyzyn atap ótti. Bul joba Qazaqstan, Ázerbaıjan jáne Ózbekstannyń birlesken bastamasy sanalady.
— Biz Ortalyq Azııa men Eýropa arasyndaǵy taza energııa men zamanaýı tehnologııalarǵa negizdelgen jańa energetıkalyq kópirdi qalyptastyryp jatyrmyz, — dedi Aqkenjenov.
Budan bólek, Qazaqstan «jasyl» sýtegi óndirý jobalaryn damytyp jatyr. Onyń ishinde Mańǵystaý oblysyndaǵy Hyrasia One jobasy bar. Sondaı-aq energetıka sektoryn jańǵyrtý jáne shyǵaryndylardy azaıtý úshin «taza kómir» tehnologııalary engizilip jatyr.
Aıta keteıik, 1–3 maýsym aralyǵynda Ázerbaıjanda Baký energetıkalyq aptalyǵy ótip jatyr. Onyń aıasynda «Kaspıı munaı jáne gaz» halyqaralyq kórmesi, «Taza energetıka» kórmesi jáne Baký energetıkalyq forýmy uıymdastyrylǵan. Jıyn barysynda Qazaqstan men Túrkııa munaı-gaz-hımııa jáne energetıka salasyndaǵy yntymaqtastyq perspektıvalaryn talqylady.
Osyǵan deıin Erlan Aqkenjenov munaı-gaz salasy kórsetkishteriniń tómendeý sebebin atady.
