Qazaqstan 2030 jylǵa taman parnıktik gazdy 15 % qysqartýdy moınyna aldy
ALMATY. QazAqparat - Almatyda búgin halyqaralyq sarapshylar klımattyq ózgerister boıynsha Ortalyq Azııa aımaǵy konferentsııasynda bas qosty, dep habarlaıdy QazAqparat tilshisi.
Jıyn barysynda Búkilálemdik banktiń Qazaqstandaǵy turaqty ókili Ato Braýn Búkilálemdik banktiń endi munaı men gaz óndirisine aqsha salmaıtynyn málimdedi.
«Álem tez ózgerip keledi, biz sol ózgeristerge beıimdelýimiz kerek. Bank Parıjde endi ónerkásiptik óndiriske aqsha salmaıtynyn málimdedi. 2019 jyldan bastap bank klımatqa qatysty jobalarǵa ınvestıtsııa salady. 2020 jylǵa taman bizdiń nesıe portfelimizdiń 28%-y klımat jobalaryna baǵyttalady», - Ato Braýn.
Qazaqstan da álemdik qaýymdastyqtyń bir bóligi retinde Parıj kelisimin ratıfıkatsııalaǵan bolatyn.
«Qazaqstan 1990 jyldan 2030 jyl aralyǵynda parnık gazyn 15%-ǵa azaıtý týraly mindetti óz moınyna aldy. Bul mindetke óndiriste úzdik tehnologııalardy, balama energetıka kózderin engizý arqyly múmkin bolmaq», - dedi QR Energetıka mınıstrliginiń Klımattyq ózgerý departamentiniń dırektory Oljas Aǵabekov.
Klımatolog mamandar Orta Azııadaǵy klımat jaqyn arada úlken ózgeristerge ushyraıtynyn aıtty.
Orta Azııa elderiniń aımaqtyq ekologııalyq ortalyǵynyń dırektory Iskandar Abdýllaevtyń aıtýynsha, klımattyq ózgeristerdiń saldary sý resýrstarynan kórinip jatyr.
«Ǵalamdyq masshtabta aýa temperatýrasy 4 grdýsqa kóterilgen jaǵdaıda sý resýstarynyń tapshylyǵy paıda bolady. Aımaqtaǵy muzdyqtardyń úshten biri erip ketken. Aýa temperatýrasy 2 gradýsqa jetken jaǵdaıda muzdyqtardyń 50%-y erıdi. 4 gradýsta 78% muzdyqtardan aırylamyz», - dedi ortalyq dırektory Iskandar Abdýllaev.
Sonymen qatar mamandar Aral, Balqash óńirleriniń ekologııalyq ahýaly, jer resýrstaryn tıimdi paıdalaný máselelerin talqylady.
