Qazaqstan 2030 jylǵa qaraı múgedek balalardyń 70 paıyzyn ınklıýzıvti bilim berýmen qamtymaq

ASTANA. QazAqparat - Qazaqstan 2030 jylǵa qaraı múgedek balalardyń 70 paıyzyn ınklıýzıvti bilim berýmen qamtymaq. Bul týraly búgin «Múmkindikteri shekteýli adamdardy áleýmettik beıimdeý jáne ıntegratsııalaýdyń ońaltý tehnologııalary men ınnovatsııalary» halyqaralyq konferentsııasy barysynda BUU Damý baǵdarlamasynyń Qazaqstandaǵy turaqty ókiliniń orynbasary Mýnhtýıa Altangerel aıtty.

«Eń birinshi kezekte múgedek balalardyń jalpy bilim berý úrdisine qosylý problemasyn sheship, olardyń oqshaýlanýyna jol bermeý qajet. Bul rette ınklıýzıvti bilim berý barlyǵy úshin de teńquqyly ashyq qoǵam qurýdyń negizi sanalady. Inklıýzıvti mektepte bilim alǵan bala kishkentaı kezinen-aq erekshe qajettilikpen balalar quqyǵyn qurmetteıtin bolady», - dedi ol.

Sonymen qatar ol múgedek balalardyń sapaly bilim alý, ınklıýzıvti bilimge qol jetimdiligi onyń bolashaqta laıyqty jumys tabýyna septigin tıgizetindigin basa atap ótti.

«Biz Qazaqstannyń 2030 jylǵa qaraı ınklıýzıvti bilim alýmen qamtylǵan múmkindigi shekteýli balalardyń úlesin 70 paıyzǵa jetkizý nıetine tolyqtaı qoldaý kórsetemiz», - dedi o.Altangerel.