Qazaqstan 2030 jylǵa qaraı atmosferany lastaýdy 25 paıyzǵa tómendetedi

ASTANA. QazAqparat - Búgin Parlament Májilisiniń jumys toby «Parıj kelisimin ratıfıkatsııalaý týraly» zań jobasyn talqylaýǵa kiristi.

Aıta keteıik, Parıj kelisimi 2015 jylǵy jeltoqsanda BUU-nyń Klımattyń ózgerýi jónindegi negizdemelik konventsııasy taraptarynyń 21-shi konferentsııasynda Frantsııada qabyldandy.

«Qazirgi tańda birqatar elder osy kelisimdi bekitti. Búginde 62 memleket ratıfıkatsııa jasady. Qazaqstan Respýblıkasy kelisimge 2016 jyly 2 tamyzda qol qoıyp, ony qoldadyq. Eger de biz ýaqytyly ratıfıkatsııa jasasaq, onda qarasha aıynda ótetin uıymnyń kelesi otyrysynda Qazaqstan óziniń dárejesin kórsete alady»,-dedi QR Energetıka vıtse-mınıstri Ǵanı Sádibekov.

Bul kelisim jahandyq ortasha temperatýranyń joǵarylaýyna jol bermeý baǵytynda jumys isteý, ıaǵnı, temperataranyń ortasha ósimin 2 gradýstan asyrmaýdy, jasyl ekonomıkaǵa qarjy kózderin kóptep tartý sekildi negizgi máselelerdi qamtyp otyr.

Kelisim aıasynda árbir tarap ulttyq deńgeıde aıqyndalǵan josparly júıeli úlesi týraly habarlap, ony oryndaıdy.

«Bes jylda bir ret iske asyrǵan úlesi jaıynda árbir tarap habarlap otyrady. Óziniń úlesin iske asyrý úshin taraptarǵa qarjylyq resýrstar kúıinde, áleýetti kúsheıtý turǵysynda tehnologııalardy ázirleý baǵytynda qoldaý jasalady»,-dedi vıtse-mınıstr.
Belgili bolǵandaı, Qazaqstan Respýblıkasy óziniń boljaýly úlesin jarııalady. Osy rette 2030 jylǵa qaraı parnıktik gazdar shyǵaryndylaryn shekteý men qysqartý boıynsha shúbásiz maqsat túrinde 15 paıyz deńgeıinde, al shartty maqsatta 25 paıyz kólemindegi kórsetkish eskerilgen.

Sonymen qatar ol Parıj kelisimine sáıkes, atalǵan úlesterge qol jetkizý zańdylyq mindetti mánge ıe emes, bul maqsattar erikti negizde oryndalatynyn jetkizdi.