Qazaqstan 2030 jylǵa qaraı parnıktik gaz shyǵaryndylaryn 15%-ǵa qysqartýdy kózdeıdi
ASTANA. KAZINFORM – Astanada ótken Óńirlik ekologııalyq sammıtte Ortalyq Azııadaǵy sý resýrstary, energetıka jáne klımattyń ózgerýi máseleleri talqylandy.
Jıynǵa Eýropalyq odaq ókilderi men Ortalyq Azııa elderiniń salalyq mınıstrleri qatysty. Sarapshylardyń aıtýynsha, óńir klımat ózgerisine eń osal aımaqtardyń biri. Halyqaralyq baǵalaýlarǵa sáıkes, ǵasyr sońyna qaraı aýa temperatýrasy 4–6 gradýsqa deıin kóterilýi múmkin. Bul muzdyqtarǵa, sý resýrstaryna, aýyl sharýashylyǵyna jáne mıllıondaǵan adamnyń turmysyna tikeleı áser etedi.
Osy jaǵdaıdy eskergen Qazaqstan klımat saıasatyn kúsheıtip, parnıktik gaz shyǵaryndylaryn azaıtýdy negizgi basymdyqtardyń biri retinde aıqyndap otyr.
El 2060 jylǵa deıin kómirtegi beıtaraptyǵyna qol jetkizý strategııasyn bekitti. Soǵan sáıkes, 2030 jylǵa qaraı shyǵaryndylardy 15%-ǵa qysqartý josparlanǵan. Al halyqaralyq qoldaý bolǵan jaǵdaıda bul kórsetkishti 25%-ǵa deıin jetkizý kózdelgen.
QR Ekologııa jáne tabıǵı resýrstar vıtse-mınıstri Nurlan Qurmalaevtyń aıtýynsha, 2025 jyldyń jeltoqsanynda 2026–2035 jyldarǵa arnalǵan jańartylǵan ulttyq úles bekitilgen. Qujat 1990 jylǵy deńgeımen salystyrǵanda shyǵaryndylardy 17%-ǵa azaıtýdy qarastyrady.
– Biz úshin derekterdiń ashyq ári salystyrýǵa keletin bolýy mańyzdy. Qazaqstan – energııa resýrstaryn eksporttaıtyn el, sondyqtan bul másele strategııalyq mánge ıe. Ásirese Eýropalyq odaqtyń jańa klımattyq talaptary, onyń ishinde energetıka salasyndaǵy metan shyǵaryndylaryn retteý máselesi ózekti, - dedi ol.
Sonymen qatar, Qazaqstan metan shyǵaryndylaryn retteý boıynsha ulttyq júıe qalyptastyryp jatyr. Bul baǵytta esepke alý, baqylaý jáne tekserý júıeleri engizilýde, sondaı-aq aǵyp ketýlerdi anyqtaý jáne joıý sharalary qarastyrylǵan.
Mamandardyń aıtýynsha, shyǵaryndylardy azaıtýmen qatar, klımat ózgerisine beıimdelý de mańyzdy baǵyt bolyp qala beredi.
Qazirdiń ózinde Ortalyq Azııa sý tapshylyǵy, shóleıttený jáne ekstremaldy aýa raıy qubylystarynyń jıileýi sııaqty kúrdeli saldarlarǵa tap bolyp otyr. Qazaqstan aýmaǵynyń shamamen 76,1%-y shóleıttenýge ortasha nemese joǵary deńgeıde beıim aımaqtarǵa jatady.
Bul jer resýrstaryn utymdy paıdalaný, orman alqaptaryn kóbeıtý jáne ekojúıelerdi qalpyna keltirý baǵytynda júıeli ári uzaq merzimdi saıasat júrgizýdi talap etedi.
Aıta keteıik, buǵan deıin jerdiń tozýy men shóleıttenýge qarsy Qazaqstan qalaı kúresip jatqanyn jazǵanbyz.
