Qazaqstan 2030 jylǵa qaraı konteınerlik júk tasymalyn 10 mln tonnaǵa jetkizbek

ASTANA. KAZINFORM – Qazaqstan 2030 jylǵa qaraı konteınerlik júk tasymalyn 10 mln tonnaǵa jetkizbek. Bul týraly Kólik vıtse-mınıstri Maqsat Qalıaqbarov aıtty.

«Qazaqstan-Nıderlandy iskerlik keńesi elderimizdiń arasyndaǵy yntymaqtastyqty nyǵaıtý úshin mańyzdy platforma sanalady. Bizdiń seriktestik qarym-qatynasymyz damyp kele jatyr. Bul is-shara yntymaqtastyqtyń mańyzdylyǵyn rastap qana qoımaı, sonymen qatar Transkaspıı halyqaralyq dálizin eń qysqa merzimde jetkizetin zamanaýı mýltımodaldy jáne tıimdi baǵytqa aınaldyrýǵa ortaq ustanymymyzdy kórsetedi», - dedi ol elordada ótken Qazaqstan-Nıderlandy birinshi iskerlik keńesinde.

Onyń atap ótýinshe, osy jyldyń 8 aıynda Orta dáliz arqyly júk tasymaldaý kólemi 69 paıyzǵa artty. 

«Qytaı-Eýropa-Qytaı baǵytynda konteınerlik tasymaldyń ósýin erekshe atap ótkim keledi. Ol 20 myń JFE-ge (jıyrma fýttyq ekvıvalent) jetip, 20 ese ulǵaıdy. Sonymen qatar, Transkaspıı halyqaralyq kólik baǵytyn damytý jónindegi jumys tobynyń birinshi otyrysy aıasynda konteınerlik poıyzdardyń sanyn jylyna 600 birlikke deıin arttyrý týraly kelisimge qol jetkizildi. 2030 jylǵa qaraı bul kórsetkishti jylyna 10 mln tonnaǵa, onyń ishinde 500 myń konteınerge jetkizý josparlanyp otyr. Qazaqstan tranzıttik baǵyttardyń negizgi elementi sanalady jáne biz jahandyq logıstıkadaǵy rólimizdi arttyrýǵa nıettimiz. Ol úshin kólik ınfraqurylymyn jaqsartý boıynsha jumys istep jatyrmyz. Bul taýardy tezirek jetkizýge, ınvestıtsııa aǵynyn qamtamasyz etýge jáne aımaqtaǵy saýdany yntalandyrýǵa múmkindik beredi», - dedi Maqsat Qalıaqbarov.

Aıta keteıik, Prezıdent Qasym-Jomart Toqaev Egemen Qazaqstan gazetine jarııalaǵan «Ortalyq Azııa renessansy: ornyqty damý jáne órkendeý joly» atty maqalasynda Qazaqstan óziniń seriktesterimen birlesip, Transkaspıı halyqaralyq kólik baǵdaryn (Orta dáliz) barynsha damytyp jatqanyn atap ótken edi. 

Senat Qytaıǵa avtomobıl júk tasymalyn damytýǵa arnalǵan qujatty maquldaǵan bolatyn.