Qazaqstan 2030 jylǵa qaraı elektr energııasynyń 15 paıyzyn JEK-ten alady

ASTANA. KAZINFORM — 2030 jylǵa deıin elimizde jańartylatyn energııa kózderi boıynsha ondaǵan joba iske qosylady. Bul týraly Kazakhstan Energy Week – 2025 jáne XVI Eýrazııalyq KAZENERGY forýmynda Energetıka vıtse-mınıstri Sanjar Jarkeshov aıtty.

- Qazaqstan jańartylatyn energııa kózderine qarqyndy túrde ınvestıtsııa salyp jatyr jáne bıyl tamasha nátıjege qol jetkizdik. Qazirgi ýaqytta bizdi jalpy qýaty 3,2 gıgavatt bolatyn 108 jańartylatyn energııa kózi qondyrǵysy bar. 2024 jyly jalpy óndirilgen energııanyń 2,8 paıyzy jańartylatyn energııa kózderine tıesili boldy. 2030 jylǵa qaraı jańartylatyn energııa kózderi óndiretin energııa kólemin 15 paıyzǵa jetkizýdi josparlap otyrmyz. Biz tek josparlap qana qoımaı, naqty is-áreketter de jasap jatyrmyz, - dedi vıtse-mınıstr.

Onyń aıtýynsha, Úkimet jańartylatyn energııa kózderine ınvestıtsııany qoldaýǵa baǵyttalǵan birqatar jobany maquldady.

- 2030 jylǵa deıin jańartylatyn energııa kózderi boıynsha ondaǵan jobany iske qosýdy josparlap otyrmyz. Jalpy qýaty 6,4 gıgavatt bolatyn kún jáne jel elektr energııasyna da aýktsıon jarııalaımyz. Osylaısha, aldaǵy 5 jyldyń ishinde jańartylatyn energııa kózderin barynsha keńeıtetin bolamyz, - dedi Sanjar Jarkeshov.

Aıta keteıik, Memleket basshysy Qasym-Jomart Toqaev Kazakhstan Energy Week — 2025 jáne XVI Eýrazııalyq KAZENERGY forýmy qatysýshylary men qonaqtaryna arnaıy úndeý joldaǵan edi.