Qazaqstan 2029 jylǵa qaraı elektr energııasyn tutynýdan artyq óndirýdi kózdep otyr
ASTANA. KAZINFORM – Quryltaı depýtaty Aıdarbek Qojanazarov Qyzylorda oblysynyń turǵyndarymen, kásipkerlerimen jáne eńbek ujymdarymen kezdesip, Prezıdent Joldaýynda belgilengen mindetterdiń iske asyrylý barysyn talqylady.
Respýblıkalyq aqparattyq-túsindirý tobynyń quramynda Halyq keńesiniń múshesi Meırambek Jumashev, Energetıka vıtse-mınıstri Erlan Akbarov, oblys ákiminiń orynbasary Baqyt Jahanov jáne oblystyq qoǵamdyq keńestiń múshesi Maqsut Nálibaev boldy.
Kezdesýler barysynda Memleket basshysy Qasym-Jomart Toqaevtyń 2026 jylǵy 28 qazandaǵy Joldaýynda aıqyndalǵan ekonomıkany damytý, ınfraqurylymdy jańǵyrtý, energetıkalyq qaýipsizdikti nyǵaıtý jáne kásipkerlikti qoldaý máseleleri qaraldy.
Aıdarbek Qojanazarovtyń aıtýynsha, Qazaqstanda jyl saıyn shamamen 123 mlrd kVt·saǵ elektr energııasy óndiriledi. Alaıda bul kólem ishki suranysty tolyq qamtamasyz etýge jetkiliksiz. Sondyqtan elimiz elektr energııasynyń bir bóligin ımporttaýǵa májbúr.
Osyǵan baılanysty Prezıdent 2029 jylǵa qaraı elektr energııasyn óndirý kólemin tutyný deńgeıinen asyrý mindetin qoıdy. Ol úshin jańa elektr stantsııalaryn iske qosyp, qoldanystaǵy energetıkalyq jeliler men jabdyqtardy jańartý qajet.
Depýtat halyq pen kásiporyndardy úzdiksiz elektr energııasymen qamtamasyz etýde sala mamandarynyń kásibıligi men jaýapkershiligi mańyzdy ekenin atap ótti.
Budan keıin aqparattyq-túsindirý toby «Atameken» óńirlik kásipkerler palatasynda bıznes ókilderimen kezdesti. Jıynǵa shaǵyn jáne orta bıznes, ónerkásip, aýyl sharýashylyǵy, saýda jáne qyzmet kórsetý salalarynyń ókilderi qatysty.
Kásipkerler salyq saıasatyn jetildirý, ákimshilik júktemeni azaıtý, uzaq merzimdi qarjylandyrýǵa qoljetimdilikti keńeıtý jáne memlekettik satyp alýǵa qatysý múmkindikterin arttyrý máselelerin kóterdi.
– Búginde kásipkerlerge eń aldymen turaqty ári túsinikti jumys erejeleri qajet. Prezıdent óz Joldaýynda ákimshilik qysymdy azaıtý, salyqtyq retteýdi jetildirý jáne bıznestiń uzaq merzimdi qarjylandyrýǵa qoljetimdiligin qamtamasyz etý boıynsha naqty mindetter qoıdy. Bizdiń maqsatymyz – osy bastamalardy iske asyrý úshin qajetti zańnamalyq negiz qalyptastyrý. Bul rette qabyldanatyn sheshimder kásipkerlerdiń, sonyń ishinde óńirlerdegi bıznes ókilderiniń naqty qajettilikterin eskerýi mańyzdy, – dedi Aıdarbek Qojanazarov.
Depýtat Memleket basshysynyń 2027 jylǵy 1 qańtardan bastap mıkro jáne shaǵyn bıznes sýbektilerin tekserýge jańa úsh jyldyq moratorıı engizý múmkindigin qarastyrý jónindegi bastamasyna da toqtaldy.
Sonymen qatar kezdesýde «Halyqtyq qurylys» baǵdarlamasyn iske asyrý máselesi talqylandy. Qatysýshylar otandyq kásiporyndardy jobalarǵa tartý, jergilikti óndiristi damytý jáne jańa jumys oryndaryn ashý múmkindikterin qarastyrdy.
Aqparattyq-túsindirý toby jumys saparyn Shıeli aýdanynda jalǵastyrdy. Aýdandyq «Arman» mádenıet úıinde ótken kezdesýde turǵyndarǵa Joldaýdaǵy áleýmettik-ekonomıkalyq damý, ınfraqurylymdy jańartý, kásipkerlikti qoldaý jáne halyqtyń ómir súrý sapasyn arttyrý mindetteri túsindirildi.
Aıta keteıik, buǵan deıin Qazaqstanda 2029 jyldyń sońyna deıin 13,3 GVt jańa elektr qýatyn iske qosý josparlanyp otyrǵany habarlanǵan bolatyn. Bul eldiń elektr energııasyna degen suranysyn qamtamasyz etip, generatsııalaý qýatynyń 20 paıyzdyq profıtsıtin qalyptastyrýǵa múmkindik beredi.
