Qazaqstan 2029 jylǵa qaraı elektr energııasy profıtsıtine shyǵýdy josparlap otyr
ASTANA. KAZINFORM — Qazaqstanda 2028–2029 jyldary 4,3 GVt jańa dástúrli generatsııa qýatyn iske qosý josparlanyp otyr. Sonymen qatar jańartylatyn energııa kózderi esebinen taǵy 5 GVt-tan astam qýat engizilip, 2029 jyly eldiń energetıkalyq júıesin turaqty profıtsıtke shyǵarý kózdelgen. Bul týraly Energetıka mınıstrligi málim etti.
Qazaqstanda 2028–2029 jyldary 4 GVt dástúrli generatsııa engiziledi
Energetıka mınıstrligi elektr energetıkasyn damytýdyń 2028–2029 jyldary jańa generatsııalaıtyn qýattardy kezeń-kezeńimen engizýdi kózdeıtin uzaq merzimdi josparyn qalyptastyrdy.
— Jospar energetıkalyq júıeniń qolda bar qýatyn arttyrýǵa, elektr energııasyna ósip kele jatqan suranysty qamtamasyz etýge, sondaı-aq dástúrli generatsııa men jańartylatyn energııa kózderin odan ári damytýǵa baǵyttalǵan, — delingen habarlamada.
2028 jyly Qazaqstanda 2 GVt dástúrli generatsııany iske qosý josparlanýda.
Atap aıtqanda, Taraz, Atyraý jáne Aqtóbe qalalarynda bý-gaz qondyrǵylaryn salý, Ekibastuz GRES-2 № 3 energoblogyn salý, «Qaraǵandy Energotsentrda» qazandyq agregaty men týrboagregatty salý, «Kazakhmys Energy» BTETs-inde qazandyq pen týrboagregatty, «Kazakhmys Energy» JEO-da qazandyq pen týrboagregatty ornatý, sondaı-aq Aqsý GRES energoblogyn keńeıtý jáne jańǵyrtý jobalary kózdelgen.
2029 jyly 2,3 GVt dástúrli generatsııany engizý josparlanyp otyr. Onyń ishinde Óskemen JEO-da týrboagregat pen qazandyq agregatyn salý, Atyraý JEO-da bes gaz-týrbınalyq qondyrǵyny engizý, «Batys Paýer» JShS-niń eki gaz-týrbınalyq qondyrǵysyn salý, Kókshetaý, Semeı jáne Óskemen qalalarynda JEO salý, sondaı-aq Ekibastuz GRES-3 birinshi blogyn iske qosý jobalary bar.
Mınıstrliktiń málimetinshe, jańartylatyn energetıka da damyp keledi. 2028 jyly 2,2 GVt, al 2029 jyly 2,8 GVt VIE nysandaryn iske qosý josparlanǵan.
Dástúrli jáne «jasyl» energetıka salalaryndaǵy iri jobalardy iske asyrý esebinen Qazaqstannyń generatsııalaıtyn qýattary aıtarlyqtaı ósip, 2029 jyly energetıkalyq júıeniń turaqty profıtsıtke shyǵýy kútiledi.
Buǵan deıin Qazaqstanda 2029 jylǵa deıin 4,3 GVt jańa elektr qýaty iske qosylatynyn jazdyq.
