Qazaqstan 2029 jylǵa deıin 13,3 GVt jańa qýattardy iske qospaq
ASTANA. KAZINFORM — Quryltaıda Ekonomıkalyq saıasat, ınnovatsııalyq damý jáne kásipkerlik máseleleri jónindegi komıtettiń energetıka salasyn damytý máseleleri qaralǵan otyrysy ótti. Onda Memleket basshysynyń Joldaýyn iske asyrý aıasyndaǵy energetıka salasyn damytý máseleleri talqylandy.
Otyrysqa qatysqan Energetıka mınıstri Erlan Aqkenjenov elektr energetıkasy salasynyń qazirgi jaǵdaıy, jańa generatsııalaýshy qýattardy iske qosý josparlary, sondaı-aq jańartylatyn jáne kómir energetıkasyn damytýdyń negizgi baǵyttary týraly baıandama jasady.
— Energetıkalyq qaýipsizdikti nyǵaıtý jáne ekonomıkanyń ósip kele jatqan qajettilikterin qamtamasyz etý maqsatynda 2029 jyldyń sońyna deıin Qazaqstanda 13,3 GVt jańa generatsııalaýshy qýattardy iske qosý josparlanyp otyr. Onyń ishinde 7,4 GVt bazalyq generatsııaǵa tıesili. Josparlanǵan jobalardy iske asyrý halyq pen ekonomıkanyń elektr energııasyna degen boljamdy qajettiligin óteýge, jasandy ıntellekt ınfraqurylymy men iri derekterdi óńdeý ortalyqtaryn elektr energııasymen qamtamasyz etýge, sondaı-aq generatsııalaýshy qýattardyń 20 paıyzdyq profıtsıtin qalyptastyrýǵa múmkindik beredi, — dep atap ótti Erlan Aqkenjenov.
2027 jyly jańa generatsııalaýshy qýattardy iske qosý esebinen elektr energııasynyń kútiletin profıtsıti 1,3 mlrd kVt·saǵ quraıdy.
Sonymen qatar Memleket basshysynyń tapsyrmasyn oryndaý aıasynda 2035 jylǵa deıingi Energetıkalyq teńgerimdi ózektendirý jumystary júrgizilip jatyr.
Jańartylatyn energııa kózderin damytýǵa da erekshe nazar aýdaryldy. Búginde elektr energııasyn óndirýdegi JEK úlesi 8,5%-ǵa jetti. Basym baǵyttardyń biri — kún energetıkasyn damytý. Qazirgi ýaqytta jalpy qýaty 900 MVt bolatyn iri kún elektr stantsııalary jobalarynyń pýly qalyptastyryldy.
Jalpy, 2035 jyldyń sońyna deıin keminde 8,4 GVt jańa JEK qýattaryn, onyń ishinde shamamen 1,8 GVt kún generatsııasyn iske qosý josparlanyp otyr.
Taǵy bir strategııalyq baǵyt — «Kómir generatsııasyn damytý» ulttyq jobasyn iske asyrý. Onyń aıasynda shamamen 7,8 GVt qýatty iske qosý jáne jańartý kózdelgen. Atap aıtqanda, segiz jańa stantsııa salý jáne qoldanystaǵy 11 energııa kózin jańǵyrtý josparlanyp otyr.
Osy sharalardy iske asyrý generatsııalaýshy qýattardy damytýǵa, energetıkalyq teńgerimdi ártaraptandyrýǵa, qoldanystaǵy ınfraqurylymdy jańǵyrtýǵa jáne eldi uzaq merzimdi perspektıvada elektr energııasymen senimdi qamtamasyz etýge negiz bolady.
