Qazaqstan 2027 jyly taekvondodan álem chempıonatyn Astanada ótkizýdi josparlap otyr
ASTANA. KAZINFORM — Qazaqstan 2027 jyly taekvondodan álem chempıonatyn ótkizýdi josparlap otyr. Bul týraly Qazaqstan taekvondo federatsııasynyń prezıdenti Qudrat Shamıev málimdedi, dep jazdy Kazinform agenttiginiń tilshisi.
14–16 tamyz aralyǵynda Jaqsylyq Úshkempirov atyndaǵy Jekpe-jek saraıynda eresekter, jasóspirimder jáne kadetter arasynda taekvondodan Kazakhstan Open 2025 (G-1) halyqaralyq reıtıngilik týrnıri ótedi. Jarysqa Kanada, Frantsııa, Úndistan, AQSh, Túrkııa jáne Qytaı sekildi 22 elden 750-den astam sportshy qatysady. Tatamıge olımpıada chempıondary men álemdik deńgeıdegi juldyzdar shyǵady.
Kazakhstan Open 2025 týrnıri Qazaqstannyń álemdik taekvondo arenasyna oralýynyń belgisi bolmaq – mundaı aýqymdy jarys elimizde sońǵy ret 2017 jyly ótkizilgen. Bıyl alǵash ret jańa KPNP K-2 elektrondy júıesi qoldanylady, sondaı-aq Dúnıejúzilik taekvondo federatsııasynyń (WT) kórsetilimdik komandasy óner kórsetedi.
Jarystyń jalpy júlde qory – 15,8 mıllıon teńge. Bul is-shara Qazaqstannyń sport salasyndaǵy senimdi seriktes retindegi pozıtsııasyn nyǵaıtyp, 2027 jyly álem chempıonatyn ótkizý jolyndaǵy mańyzdy qadam bolmaq. Qazaqstan bul chempıonatty ótkizýge kelesi jyly resmı ótinim berýdi josparlap otyr.
– Qazaqstan Prezıdenti Qasym-Jomart Toqaev eldegi sportty damytýǵa erekshe mán beredi. Biz, Federatsııa retinde, bul baǵyttyń jastar men óskeleń urpaq úshin qanshalyqty mańyzdy ekenin jaqsy túsinemiz. Sondyqtan Astanada iri halyqaralyq týrnırlerdi ótkizýdi maqsat etip otyrmyz. Kazakhstan Open – jaı ǵana jarys emes, bul – elimizdiń álemdik deńgeıdegi iri sporttyq oqıǵalardy qabyldaýǵa daıyn ekeniniń belgisi. Biz Astanany álemdik taekvondonyń jańa astanasyna aınaldyrǵymyz keledi, – dedi Qazaqstan taekvondo federatsııasynyń basshysy Qudrat Shamıev.
Buǵan deıin Memleket basshysy Qasym-Jomart Toqaev Dúnıejúzilik taekvondo federatsııasynyń prezıdenti Chýngvon Choýmen kezdesken bolatyn. Prezıdent WT basshysynyń sapary el sport qoǵamdastyǵy úshin mańyzdy oqıǵa ekenin atap ótip, Dúnıejúzilik federatsııanyń Qazaqstanda taekvondony damytýǵa jan-jaqty qoldaý kórsetýge daıyn ekenin rastaǵan edi.