Qazaqstan 2027 jyldan bastap elektr energııasy profıtsıtin qalyptastyrýdy josparlap otyr
ASTANA. KAZINFORM — Qazaqstan 2027 jyldyń basynan bastap elektr energııasyna degen ishki suranysty tolyq qamtamasyz etip, keıinnen elektr energııasy profıtsıtin qalyptastyrýdy josparlap otyr. Bul týraly Úkimet otyrysynda Energetıka mınıstri Erlan Aqkenjenov málim etti.
Mınıstrdiń aıtýynsha, qazirgi tańda Qazaqstannyń energojúıesi 254 energııa kózinen turady, onyń 172-si jańartylatyn energııa kózderi. Eldegi jalpy ornatylǵan qýat 27,1 GVt-ty quraıdy.
— Belgilengen qýattyń negizgi bóligi dástúrli generatsııa kózderine tıesili. Atap aıtqanda, 13,7 GVt — kómir, 7,1 GVt — gaz, 2,5 GVt — iri sý elektr stantsııalary. Jańartylatyn energııa kózderiniń jalpy qýaty 3,8 GVt-ty quraıdy, — dedi mınıstr.
Onyń málimetinshe, ótken jyly elektr energııasyn óndirý kólemi 123,1 mlrd kVt/saǵatty, al tutyný 124,6 mlrd kVt/saǵatty quraǵan. Bıyl bul kórsetkishterdiń ósýi kútilip otyr, boljam boıynsha óndiris kólemi 126,5 mlrd kVt/saǵatqa jetpek.
Sonymen qatar mınıstr elektr energııasyn óndirý men tutyný arasyndaǵy alshaqtyqtyń birtindep qysqaryp kele jatqanyn atap ótti. 2035 jylǵa deıingi energetıkany damytý jospary aıasynda jalpy 26,3 GVt jańa generatsııa qýatyn iske qosý kózdelgen. Onyń ishinde 2029 jylǵa deıin 13,3 GVt jańa qýat engiziledi. Onyń 7,4 GVt-y bazalyq generatsııaǵa, 5,9 GVt-y jańartylatyn energııa kózderine tıesili.
— Bul 2027 jyldan bastap ishki elektr energııasyna degen qajettilikti tolyq qamtamasyz etýge jáne keıinnen profıtsıt qalyptastyrýǵa múmkindik beredi, — dedi Erlan Aqkenjenov.
Sonymen qatar mınıstr jańa qýattar jasandy ıntellekt jáne derekter ortalyqtary sııaqty energııany kóp qajet etetin salalardyń damýyna jaǵdaı jasaıtynyn atap ótti.
— Kómir generatsııasyn damytý ulttyq jobasy aıasynda jalpy qýaty 7,8 GVt bolatyn ınvestıtsııalyq jobalar júzege asyrylýda. Olardyń qatarynda Ekibastuz GRES-3, Kýrchatov JES, sondaı-aq Kókshetaý, Semeı jáne Óskemen qalalaryndaǵy úsh jylý elektr ortalyǵy bar, — dedi ol.
Atap aıtqanda jobaǵa 19 energetıkalyq joba kiredi, onyń 8-i jańa qurylys, 11-i jańǵyrtý jáne keńeıtý jobalary.
Sonymen qatar mınıstr elde gazdandyrý jumystary 2035 jylǵa deıingi bas shemaǵa sáıkes júrgizilýde. 2026 jylǵy 1 qańtardaǵy jaǵdaı boıynsha gazdandyrý deńgeıi 64,2%-dy qurap, tabıǵı gazǵa 13,1 mln adam qol jetkizgen dep túıindedi.
Buǵan deıin Qazaqstanda eń tómengi jalaqyny arttyrý máselesi qaralatynyn jazǵanbyz.
