Qazaqstan 2026 jyly 20-ǵa jýyq halyqaralyq jarysty qabyldaıdy
ASTANA. KAZINFORM – 2026 jyly Qazaqstan álemdik jáne qurlyqtyq deńgeıdegi 20-ǵa jýyq iri halyqaralyq sporttyq jarysty ótkizedi.
Halyqaralyq sporttyq is-sharalar Astana, Almaty jáne Túrkistan qalalarynda uıymdastyrylyp, olımpıadalyq, paralımpıadalyq jáne ınnovatsııalyq sport túrlerin qamtıdy.
«2026 jyly elimiz halyqaralyq sport kúntizbesindegi mańyzdy ortalyqtardyń birine aınalady. Jyldyń basty jarystarynyń qatarynda dzıýdodan Grand-slam, stend atýdan ISSF Álem kýbogy, para kanoeden Azııa chempıonaty, bochchadan Álem kýbogy, karateden Azııa chempıonaty jáne taekvondodan (WT) Fınaldyq Gran-prı bar», – delingen habarlamada.
Іri jarystardyń biri – 29 shilde men 9 tamyz aralyǵynda Astanada ótetin «Bolashaq oıyndary» halyqaralyq mýltısporttyq týrnıri bolmaq. Bul joba dástúrli sport pen tsıfrlyq tehnologııalardy biriktiretin fıdjıtal sport túrlerin damytýǵa baǵyttalǵan.
Sondaı-aq jyl boıy elimizde velotrekten Silk Way Series jáne Astana Open Series halyqaralyq jarystary, jeńil atletıkadan Ǵusman Qosanov memorıaly, djıý-djıtsýdan Azııa chempıonaty, ústel tennısinen Qazaqstan Respýblıkasy Prezıdentiniń Ashyq kýbogy, mánerlep syrǵanaýdan Denis Ten Memorial Challenge Series týrnıri jáne basqa da bedeldi dodalar uıymdastyrylady.
Budan bólek, Astanada júzýden Álem kýbogynyń kezeńi, golboldan jastar arasyndaǵy álem chempıonaty jáne parasport baǵytyndaǵy birneshe halyqaralyq týrnır ótedi.
Halyqaralyq jarystardy ótkizý eldiń sporttyq bedelin arttyrýmen qatar, sporttyq týrızmdi damytýǵa, ınvestıtsııa tartýǵa jáne sport ınfraqurylymyn jetildirýge múmkindik beredi.
«2027 jyl da Qazaqstan sporty úshin erekshe mańyzdy bolmaq. Keler jyly elimizde 7 álem chempıonaty, 2 Azııa chempıonaty jáne 19 jasqa deıingi jasóspirimder arasyndaǵy fýtzaldan Eýropa chempıonatyn ótkizý josparlanyp otyr», – dep atap ótildi aqparatta.
Bıyl tamyz aıynda Astanada bochchadan álemdik reıtıngtik týrnır – Astana 2026 World Boccia Cup ótedi.
Aıta keteıik, Artem Kýchın Qazaqstandaǵy QFF Tórelik konventsııasynyń úılestirýshisi bolyp taǵaıyndaldy.
