Qazaqstan 2026 jylǵa deıin zerttelgen jer qoınaýyn 2,2 mln sharshy shaqyrymǵa deıin ulǵaıtady
ASTANA. KAZINFORM – «Geoscience & Exploration Central Asia» halyqaralyq forýmynda ótken «Ortalyq Azııanyń kómirsýtek resýrstary: damýy men syn-qaterleri» taqyrybyndaǵy paneldik sessııada Energetıka vıtse-mınıstri Erlan Akbarov jer qoınaýyn paıdalanýdy damytý strategııasy men ınvestıtsııa tartýǵa baǵyttalǵan zańnamalyq ózgeristerdi tanystyrdy.
Vıtse-mınıstrdiń aıtýynsha, Qazaqstannyń jer qoınaýyn paıdalaný salasy 2023 jyldan bastap qarqyndy damyp keledi. Geologııalyq barlaýǵa salynǵan ınvestıtsııa kólemi shamamen 433 mıllıard teńgege jetti, al kómirsýtekterdi barlaý men óndirýge arnalǵan kelisimsharttar sany 319-ǵa deıin artty.
Erlan Akbarov Memleket basshysynyń 2026 jylǵa deıin geologııalyq zerttelgen aýmaqty 1,5 mıllıonnan 2,2 mıllıon sharshy shaqyrymǵa deıin ulǵaıtý tapsyrmasyn oryndaý máselesine nazar aýdardy. Osy maqsatta 2022-2025 jyldary zańnamaǵa birqatar túzetýler engizildi. Olardyń ishinde «dástúrli emes kómirsýtekter» uǵymyn engizý, elektrondyq aýktsıondardy jeńildetý jáne kúrdeli jobalarǵa arnalǵan Jaqsartylǵan modeldik kelisimshartty ázirleý bar.
Jańa sharalar ákimshilik kedergilerdi tómendetýge baǵyttalǵan. Endi ınvestorlar aýktsıon ótinimindegi qatelerdi túzete alady, al seısmıkalyq zertteýler burǵylaýdyń tıimdi emestigin dáleldegen jaǵdaıda ýchaskeni aıyppulsyz qaıtarýǵa múmkindik bar. Bul jer qoınaýyn paıdalanýshylarǵa ár kezeńde 300 myń AQSh dollaryna deıin únemdeýge jaǵdaı jasaıdy.
Salany tsıfrlandyrý jáne ashyqtyqty arttyrý aıasynda ótkizilgen 11 aýktsıon nátıjesinde 55 mıllıard teńge kóleminde ınvestıtsııalyq mindettemeleri bar 121 ýchaske berildi.
Sonymen qatar, Erlan Akbarov ıgerilip jatqan ken oryndaryn qoldaý maqsatynda «Jer qoınaýyn paıdalanýǵa balamaly salyq» rejımin engizý týraly aıtty. Bul rejım ken oryndaryn paıdalaný merzimin 25 jylǵa deıin uzartýǵa múmkindik beredi. Memlekettiń strategııalyq baqylaýy kúsheıtilip, barlyq iri ken oryndaryna ulttyq kompanııanyń keminde 50% úlesi zańda bekitildi.
Sońǵy eki jylda 35 munaı ken orny óndiriske ótti, al Rojkovskoe, Ońtústik Aqsaı jáne Anabaı jobalarynda gaz óndirý bastaldy.
Geologııalyq barlaýdy jandandyrý maqsatynda «Jer qoınaýy jáne jer qoınaýyn paıdalaný týraly» Kodekske az zerttelgen aýmaqtardaǵy jumysqa qatysty túzetýler engizildi. Bul ózgerister ınvestorlarǵa qolaıly jaǵdaı jasaý jáne jer qoınaýyn paıdalaný quqyǵyn alý rásimderin jeńildetýge baǵyttalǵan. Jaqyn arada Qazaqstan uzaq merzimdi energetıkalyq turaqtylyǵyn qamtamasyz etý úshin perspektıvaly ýchaskelerdi aýktsıonǵa shyǵarady.
Energetıka mınıstrligi ashyqtyq saıasatyn jalǵastyryp, óńirdegi jer qoınaýyn joǵary tehnologııalyq barlaý men ıgerýge ınvestıtsııa salýǵa daıyn halyqaralyq kompanııalarǵa qoldaý kórsetýdi josparlap otyr.
Buǵan deıin bıyl jer qoınaýyn ıgerý kelisimsharttaryna revızııa jasalatynyn habarlaǵan edik.