Qazaqstan 2025 jylǵa deıin kómir óndirisin 70-ten 40,3% deıin azaıtady

NUR-SULTAN. QazAqparat – Parıj kelisimi aıasynda Qazaqstan 2025 jylǵa deıin kómir óndirisin 70%-dan 40,3%-ǵa deıin qysqartady. Úkimet otyrysynda Energetıka mınıstri Maǵzum Myrzaǵalıev osyndaı aqparat berdi, dep habarlaıdy QazAqparat tilshisi.

«Kórsetilgen josparlardy iske asyrý elektr energııasyn generatsııalaý qurylymynda mynadaı ózgeristerge qol jetkizýge múmkindik beredi. Birinshiden, kómir óndirý úlesi 70 paıyzdan 40,3 paıyzǵa deıin tómendeıdi. Ekinshiden, gaz generatsııasy 20 paıyzdan 38 paıyzǵa deıin ulǵaıady. Úshinshiden, jańartylatyn energııa kózderiniń úlesi 3 paıyzdan 15 paıyzǵa deıin artady», - dedi vedomstvo basshysy.

Onyń sózine qaraǵanda, bul Qazaqstanǵa Parıj kelisimi boıynsha jasalǵan mindettemelerdi oryndaýǵa múmkindik berip, 2060 jylǵa qaraı odan ári dekarbonızatsııalaý jáne kómirtegi beıtaraptyǵyna qol jetkizýdiń negizi qalanady.

Sondaı-aq, Maǵzum Myrzaǵalıev Úkimet otyrysynda elimizdiń soltústigi men shyǵysyndaǵy oblystardy gazdandyrýdyń eki joly qarastyrylyp otyrǵanyn aıtty.

«Petropavl, Kókshetaý, Óskemen, Semeı, Pavlodar qalalary búgingi tańda gazdandyrylmaǵan. Sonymen qatar, atalǵan qalalardy gazben qamtamasyz etýdiń kelesideı joldary bar. Atap aıtsaq, «Saryarqa» magıstraldyq gaz qubyryn jalǵastyrý nemese Reseı Federatsııasynan magıstraldyq gaz qubyrlaryn tartý. Jyl sońyna deıin «Gazprom» men «QazTransGaz» elimizdiń soltústik jáne shyǵys óńirlerin gazdandyrý boıynsha esepteý júrgizip, tıimdi nusqasyn ázirleıdi» - dedi mınıstr.