Qazaqstan 2025 jyly turǵyndary Grýzııaǵa eń kóp saparlaǵan elderdiń ondyǵyna kirdi

ASTANA. KAZINFORM – Ótken jyly qazaqstandyqtar Grýzııaǵa 170 myń ret saparlaǵan. Sóıtip elimiz Grýzııaǵa barýshylar sany jaǵynan altynshy orynǵa turaqtady, dep habarlaıdy Kazinform menshikti tilshisi Grýzııanyń Ulttyq týrızm ákimshiligine silteme jasap.

2025 jyly Grýzııa sheteldik týrıster sany boıynsha jańa rekord ornatty.

Ulttyq týrızm ákimshiliginiń málimetinshe, elge 5 mln 521 myń 866 sheteldik týrıst kelgen. Bul – ótken jylmen salystyrǵanda 8,4 paıyzǵa kóp.

Jalpy týrıstik aǵynnyń qalyptasýyna aımaq elderi aıryqsha úles qosty. Sonyń ishinde Qazaqstan da bar. 2025 jyly qazaqstandyqtar Grýzııaǵa 169 myń 367 ret saparlaǵan. Bul kórsetkish 2024 jylmen salystyrǵanda 5,3 paıyzǵa azaıǵanymen, Qazaqstan grýzın týrızmi úshin mańyzdy naryq retindegi ornyn saqtap qaldy.

Osylaısha, Qazaqstan Grýzııaǵa kelýshiler sany boıynsha alǵashqy on eldiń qataryna enip, turaqty týrıstik seriktes mártebesin saqtap qaldy.

Al týrıstik maqsattan tys saparlardy qosa eseptegende, 2025 jyly shetel azamattary Grýzııaǵa jalpy sany 7,8 mıllıonnan astam ret kelgen. Bul – bir jyl ishindegi ósim 5,9 paıyzdy quraıdy degen sóz. Elge eń kóp kelgender qatarynda Reseı, Túrkııa jáne Armenııa kósh bastasa, Izraıl, Ázerbaıjan jáne Qytaı tarapynan kelýshiler sanynyń aıtarlyqtaı artqany baıqalǵan.

Sonymen qatar, Eýropa odaǵy elderi men Ulybrıtanııadan kelgen týrıster legi de ulǵaıǵan. Bul baǵytta shamamen 500 myń sapar tirkelip, ósim 14 paıyzdy qurady. Týrızm úshin eń qyzý kezeń jyl sońyna tuspa-tus keldi: qyrkúıek pen jeltoqsan aralyǵynda týrıstik saparlar sany 1 mln 214 myń 772-ge jetip, jyldyq esepte 10,5 paıyzǵa artqan.

Osyǵan deıin Astananyń Eýropanyń qoljetimdi týrızm jelisine resmı túrde qosylǵany týraly jazdyq.