Qazaqstan 2025 jyly Qytaıdaǵy eń perspektıvalyq týrıstik baǵyt dep tanyldy
ALMATY. KAZINFORM — Qazaqstan «2025 jylǵy eń perspektıvalyq jańa baǵyt» marapatyn ıelendi.
Qytaıdyń jetekshi onlaın-týrıstik agenttigi Tongcheng Travel bul marapatty «Kazakh Tourism» kompanııasyna tabystady.
Aıta ketken jón, Qytaıdaǵy eń iri onlaın-týrıstik agenttikterdiń biri sanalatyn Tongcheng Travel platformasy 230 mıllıonnan astam qoldanýshyny biriktiredi.
Onlaın-agenttik derekterine súıensek, 2024 jyly qytaılyq týrıster arasynda Qazaqstanǵa saıahattaýǵa degen suranys oǵan deıingi jylmen salystyrǵanda 300% arta túsken. Tongcheng Travel bul úrdis 2025 jyly da jalǵasady dep boljaıdy.
— Týrızm jyly aıasynda Qytaı týrısteriniń qatary shamamen eki ese artqanyn jáne Qazaqstanǵa saıahattaýǵa degen suranystyń aıtarlyqtaı óskenin baıqadyq. Biz bul úrdisti qoldap, Aspan asty eliniń jetekshi onlaın-platformalarymen yntymaqtastyqty keńeıtýdi dittep otyrmyz, — dep atap ótti «Kazakh Tourism» UK» AQ basqarmasy tóraǵasy Qaırat Sádýaqasov.
2024 jyly Qytaıdaǵy Qazaqstan týrızminiń jyly nátıjesinde QHR kelgen týrıster legi 78% ulǵaıyp, 655 myń adamǵa jetti.
Eske salaıyq, 2024 jyl Qytaıdaǵy Qazaqstan týrızmi jyly bolyp, aspan asty eliniń iri qalalarynda 30-dan astam is-shara ótti.