Qazaqstan 2025 jyly Grýzııaǵa 80 myń tonna bıdaı eksporttaıdy
ASTANA. KAZINFORM – Qazaqstan 2025 jyly Grýzııaǵa 80 myń tonna bıdaı eksporttaıdy. Bul týraly Aýyl sharýashylyǵy mınıstri Aıdarbek Saparov aıtty.
- Grýzııa memleketimen jumysty bastap kettik. 2023 jyly biz ol elge bıdaı da, et te shyǵarmaǵan bolatynbyz. 2024 jyly olarmen qarym-qatynasty túzep, bıdaı, sıyr etterin eksporttadyq. Ótken jyldyń qorytyndysy boıynsha 71 mln dollarǵa eksport jasaldy. Bıdaı men etti eksporttaý boıynsha jumys bıyl da jalǵasatyn bolady, - dedi mınıstr Qazaqstan jáne Grýzııa Úkimet basshylarynyń kelissózinen keıin BAQ ókilderine.
AShM basshysynyń aıtýynsha, bıyl bıdaıdyń baǵasy byltyrǵy jylǵa qaraǵanda tómen. Sol sebepti eki ortadaǵy logıstıkaǵa sýbsıdııa tólenedi.
- Grýzııaǵa bıyl 80 myń tonna bıdaı eksporttaýǵa kelistik. Olardyń jyldyq tutyný qajettiligi 80-100 myń tonna. Al et boıynsha, olardyń tarapynan qansha suranys bolsa, biz sonsha et jetkizýge daıynbyz, - dedi Aıdarbek Saparov.
Aıta keteıik, buǵan deıin 20 jyl ishinde el ekonomıkasyna grýzııalyq ınvestorlar qansha qarjy quıǵanyn jazǵan edik.
Sondaı-aq Qazaqstan men Grýzııa arasynda Transkaspıı halyqaralyq kólik baǵyty arqyly júk tasymaldaý kólemi ótken jyly 62 paıyzǵa artty.